Цахим спортын “CS2” төрлийн томоохон тэмцээнүүдийн нэг “ESL Pro League”-ийн 21 дэх улирал Шведийн Стокхольм хотноо үргэлжилж байна. 400 мянган ам.долларын шагналын сантай тус тэмцээнд Монгол Улсын шигшээ баг “The MongolZ” оролцож байгаа юм.

Тэд өчигдөр ээлжит тоглолтоо Францын “3DMAX” багийн эсрэг хийж 2-0 харьцаагаар өрсөлдөгчөө буулган авчээ. Хоёр баг өмнө нь 4 удаа таарч тоглоход хожлын харьцаа 2:2 болоод байсан юм. Тэгвэл 5 дахь удаагийн тоглолтод MongolZ хожлоо. “3DMAX” багийн эсрэг тоглолтод “Senzu” буюу М.Азбаяр хувийн амжилтаараа багаа тэргүүлсэн байна.

Ингэснээр “The MongolZ” баг анх удаагаа “ESL Pro League”-ийн плей-оффын шатанд шалгарч байна. Өнөөдөр манай баг шигшээ шатны эрхийн сүүлийн тулаанаа хийнэ.