Английн хөл бөмбөгийн хамгийн нэр хүндтэй клуб болох “Манчестер Юнайтед” 100 мянган үзэгчийн суудалтай шинэ цэнгэлдэх хүрээлэн барихаар төлөвлөж байгааг тус клубийн хамтран эзэмшигч Жим Рэтклифф мэдэгджээ. 

Ойролцоогоор 2 тэрбум фунт стерлингийн өртөгтэй уг төслийг алдарт уран барилгач Норман Фостерын компани хэрэгжүүлэх ажээ. 

“Дэлхий дээрх хамгийн том цэнгэлдэх хүрээлэн байгуулах гайхалтай аялал өнөөдөр ийнхүү эхэлж байна” гэж Ж.Рэтклифф “Манчестер Юнайтед”-ын төлөвлөгөөг танилцуулахдаа мэдэгдсэн байна.  “Манай одоогийн цэнгэлдэх хүрээлэн сүүлийн 115 жилийн турш бидэнд гайхалтай сайн үйлчилсэн боловч дэлхийн спортын шилдэг цэнгэлдэх хүрээлэнгүүдийн стандартаас хоцорч байна. Шинэ цэнгэлдэх хүрээлэн барьснаар “Олд Траффордын” мөн чанарыг хадгалж үлдэх болно” гэж тэрбээр хэлжээ.

“Foster and Partners” компаниас гаргасан төслийн концепцийн гэрэл зургуудыг тус клубийн цахим хуудсанд нийтэлсэн байна.

Шинэ цэнгэлдэх хүрээлэн барих, “Олд Траффорд”-ыг шинэчлэх төсөл нь Британийн эдийн засагт 7.3 тэрбум фунт стерлингийн нэмэлт орлого авчирч, 92 000 шинэ ажлын байр бий болгоно гэж клубийн удирдлагууд мэдэгджээ. 

“Манчестер Юнайтед” клуб Английн Премьер лигийн тэмцээний хүснэгтийн 14-т бичигдэж байгаа бөгөөд хамгийн сүүлд 10 гаруй жилийн өмнө буюу 2013 онд аварга болж байв.

Эх сурвалж: Монцамэ агентлаг