Өнөөдөр Эрүүл мэндийн яам “Улаанбурхан өвчний дархлаажуулалт улсын хэмжээнд 95 хувьтай байна” хэмээн мэдээлэв. Улаанбурхан, гахайн хавдар, улаануудын эсрэг вакцины нэгдүгээр тунд хамрах ёстой хүүхдүүдийн 95,6%, хоёрдугаар тунг хийлгэх хүүхдүүдийн 95,1% нь тариулжээ. Харин Баян-Өлгий, Дорноговь, Сүхбаатар, Дундговь аймагт вакцинжуулалт 80 гаруй хувьтай байна.

 Амьсгалын замаар дамждаг, халдварлалт маш өндөр улаанбурхан өвчтэй 4 хүн сүүлийн хоёр хоногт бүртгэгдсэнээр өнөөдрийн байдлаар хотын хэмжээнд нийт 11 өвчтөн илрээд байгаа юм.

Эрүүл мэндийн сайд Т.Мөнхсайхан улсын хэмжээнд улаанбурхны эсрэг вакцинжуулалтыг эрчимжүүлэх арга хэмжээ авч, хэрэгжүүлэхийг ХӨСҮТ-д даалгасан. Ингээд ХӨСҮТ улаанбурхан өвчний товлолт вакцинд хамрагдаагүй хүүхдүүдийг яаралтай дархлаажуулалтад хамруулж, эцэг эх, асран хамгаалагчдыг хүүхдийнхээ эрүүл мэндэд хариуцлагатай хандахыг анхааруулсан.

     Тэгвэл манай саит улаанбурхны эсрэг дархлаажуулалт хэр байгааг тодруулан сурвалжлахаар Сүхбаатар, Чингэлтэй дүүргийн хэд хэдэн өрхийн эмнэлгээр орсон боловч дархлаажуулалтыг эрчимжүүлэх арга хэмжээ болон газар дээрх нөхцөл байдал тэс өөр байв.

Бид өчигдөр Сүхбаатар дүүргийн 1-2 дугаар хорооны “Ачит гар” өрхийн эрүүл мэндийн төвд 12:00 цагт очлоо. Тус төв улаанбурхны эсрэг товлолт вакцин хийж байгаа гэсэн боловч биднийг очих үед ямар ч хүнгүй, “Эмч, сувилагч нь “Сонгдо” эмнэлэг рүү вакцин хийхээр явсан” хэмээн мэдээлэл өгөхөөс татгалзав. Вакцин хийлгэхээр ирсэн хүүхэд нэг ч байсангүй.

Харин өнөөдөр 10 цагт Чингэлтэй дүүргийн эрүүл мэндийн төвийг зорилоо. Улаанбурхны вакцинжуулалт ямар байгаа талаар тус төвийн их эмчээс тодруулахад “Манайд вакцин хийгээгүй. Өрхийн эмнэлгүүд хийж байгаа. Тэндээс очиж мэдээлэл ав” хэмээв. Үүний дагуу тус дүүргийн 4-р хорооны нутаг дэвсгэр дэх “Энэрэнгүй-Үйлс” өрхийн эрүүл мэндийн төвд ирэхэд “Манайд үзүүлээд, 5-р хорооны өрхийн эмнэлэг дээр вакцинаа хийлгэж байгаа. Мэдээлэл өгөхгүй” гэв.

Ингээд 5-р хорооны өрхийн эрүүл мэндийн төв дээр ирэхэд, дархлаажуулалтын өрөөний гадна оочир, дараалал байхгүй эл хуль байв. Биднийг ирснээс 20-30 минут болсны дараа улаанбурхны эсрэг вакцин хийлгэхээр 2 хүүхэд эцэг, эхийн хамт ирлээ. Тухайн хүүхдүүд товлолт вакциндаа хамрагдаагүй бөгөөд одоо хийлгэхээр ирж буй нь энэ байв. Ингээд вакцины сувилагчаас өдөрт хэдэн хүүхэд улаанбурхны эсрэг вакцинд хамрагдаж байгаа талаар асуухад “Мэдээлэл өгөхгүй. 6-р хороон дээр хийж байгаа” гэсэн хариултаас өөр юм хэлсэнгүй. Вакцин хийлгэхээр ирсэн өөр хүүхэд, эцэг эх ч байсангүй.

   Ийн бид нийслэлийн томоохон хоёр дүүргийн өрхийн эмнэлгүүд дээр очиход улаанбурхны дархлаажуулалтын талаар тодорхой мэдээлэл өгөхөөс эрс татгалзлаа. Угтаа бид улаанбурхны эсрэг дархлаажуулалт ямар хэмжээнд явагдаж байгаа талаар тодруулан сурвалжлахыг зорьсон билээ.

Эрүүл мэндийн сайд нь дархлаажуулалтыг эрчимжүүлэх арга хэмжээ авч ажиллахыг даалгасан ч өрхийн эрүүл мэндийн төвүүд нь эл хуль, нам гүм, эцэг эхчүүд нь ч хайнга, хойрго, улаанбурхны эсрэг дархлаажуулалт явагдаж буй дүр зураг байхгүй байв.

Эхэнд дурдсан улаанбурхан өвчний дархлаажуулалт улсын хэмжээнд 95 хувьтай байна гэсэн мэдээ үнэн эсэх нь эргэлзээтэй санагдахаар байна. Лабораториор онош нь батлагдсан 11 өвчтөний дийлэнх нь улаанбурхны эсрэг дархлаажуулалтад хамрагдаагүй хүүхдүүд байгаа юм. Эрүүл мэндийн яамнаас нь анхааруулга мэдээ гаргаж, улаанбурхны дархлаажуулалтад хүүхдүүдээ хамруулаач гэж байгаа ч тоож хүлээн авч байгаа эцэг эх байхгүй бололтой. Арга хэмжээ авах нэгдүгээр шатлалын эмнэлгүүд нь ч эл хуль байна. Т.Мөнхсайхан сайд аа! Улаанбурхны эсрэг вакцин хийлгэхгүй байна.