БНСУ-ын волейболын тамирчин Ким Ён Кун “10” дугаартай өмсгөлөө Солонгосын шигшээ багийн ахлагч Park Jeong ah-д шилжүүлэн өглөө.

Волейболын хатан хаан, Азийн Гамова хочит 37 настай Ким Ён Кун бүх цаг үеийн шилдэг тоглогчийн нэгд зүй ёсоор ордог, волейболын ертөнцийн тод од билээ. Тэрээр энэ улирлын тэмцээнээ дуусгасны дараа их спортоосоо зодог тайлах шийдвэр гаргасан. Тодруулбал тавдугаар сард болох бүх оддын тоглолтод сүүлийн удаа оролцох болсноо албан ёсоор зарласан юм. Энэ хүрээнд 10 дугаарын өмсгөлөө Солонгосын шигшээ багийн ахлагч Park Jeong ah-д өгсөн байна.

    Түүний хувьд 2005-2006 оны “V League”-ын улирлаас мэргэжлийн тамирчны гараагаа эхлүүлж, БНСУ-ын шигшээ багийг 16 жилийн турш ахлан, “Бээжин-2008”, “Лондон 2012”, “Токио-2021” олимпын наадамд оролцсон туршлагатай тамирчин.

    Тэрээр мэргэжлийн карьертаа сэтгэл хангалуун байдаг ч “Лондон 2012”, “Токио 2021” олимпын наадамд хүрэл медалийн үзүүрээс атгаад алдсандаа харамсаж явдаг тухайгаа хэлсэн байдаг.

Хэдийгээр 2012 оны Лондонгийн олимпын наадмын хүрэл медалийг авч чадаагүй ч хамгийн үнэ цэнтэй тоглогчоор шалгарч, 207 оноо авсан амжилтаараа олимпын наадмын дээд амжилтыг тогтоож байв.

Ким олон улсын олон тэмцээн, уралдаан олимпын наадамд орсноос гадна Япон, Хятад, Туркийн лигүүдэд тоглож, Дэлхийн хэмжээнд өөрийгөө ямар тоглогч гэдгээ батлан харуулсан.

Их спортоосоо зодог тайлах болсон тухайгаа “Миний үе мөч өвддөг болсон. Тиймээс өндөр түвшний ур чадвартай байхдаа зодог тайлах нь зөв гэж бодсон. Би олон жил шаргуу хөдөлмөрсөн. Цаашдаа ямар ч үүрэг хүлээсэн волейболын спортод хувь нэмрээ оруулсаар байх болно” хэмээсэн юм.