Европын холбооны СВИЧ-Эшиа хөтөлбөрийн санхүүжилттэй, МБҮА ТББ-ын хамтран хэрэгжүүлдэг “Дулаан шийдэл II” төслийн хүрээнд “Дулаалсан байшинтай танилцах, барилгын эрчим хүч хэмнэлтийн үр дүнг танилцуулах нээлттэй өдөрлөг”-ийг зохион байгуулдаг. Ингэснээр барилгын дулаалга, эрчим хүч хэмнэлтийн ач холбогдлын талаар төр, хувийн хэвшил, дотоодын болон олон улсын байгууллагууд, олон нийтэд тайлбарлан таниулж, агаарын бохирдол, хүлэмжийн хийн ялгарлыг бууруулах чиглэлээр талуудын хамтын ажиллагааг бэхжүүлэх, бодитой ажил, арга хэмжээ авахад нь түлхэц болохыг зорьдог.
Энэ удаагийн нээлттэй өдөрлөгөө 2025 оны 3 дугаар сарын 12-нд зохион байгуулж, “Дулаан шийдэл II” төслийн хүрээнд Бодь Пропертийз ХХК-ийн санхүүжилтээр бүтэн дулаалга хийлгэсэн 2 айл өрхийн нэг болох СХД-ийн 7-р хорооны иргэн У.Насанбатын дулаалсан байшинг танилцууллаа. Дулаалгын ажлыг Ц.Пүрэв ахлагчтай “Дулаан шийдэл II” төслийн хүрээнд чадавхажсан барилгын баг 2025 оны 2 дугаар сарын 4-18-ний хооронд 14 хоногт хийж гүйцэтгэсэн. 7.8х6.8м хэмжээтэй энэхүү байшингийн ханыг 15 см чулуун хөвөн, дээврийг 20 см эрдэст хөвөн, суурийг 10 см XPS хөөсөнцрөөр технологийн дагуу дулаалснаар 45 хувийн эрчим хүчний хэмнэлт үүсэж, тэр хэрээр түлш зарцуулалт буурснаар жилд 11,6 тонн хүлэмжийн хийн ялгарахаас сэргийлсэн гэдэг эрчим хүчний аудиторын дүгнэлт гарсан байна.
Өөрөөр хэлбэл, дулаалахаас өмнө тухайн айл өрхийн жилийн цахилгааны хэрэглээ нь 34691 кВТ.цаг байсан бол дулаалсны дараа энэ үзүүлэлт 19244 кВт болж буурч байгаа юм. Мөн төслийн хүрээнд цонх сайжруулж, хаалга сольсноор барилгын насжилт, өнгө үзэмж сайжран, дулааны тав тух нэмэгдэхийн зэрэгцээ өрхийн эдийн засагт эерэг нөлөөлж байна. Тодруулбал, У.Насанбатынх дулаалга хийлгэхээс өмнө сард 200 мянган төгрөгийн түлш хэрэглэж, өдөрт 2 удаа галладаг байсан бол дулаалга хийлгэснээр энэ зардал 100 мянган төгрөг болтлоо буурч, өдөрт нэг удаа галладаг болж, агаарын бохирдлыг бууруулахад тодорхой хувь нэмрээ оруулж байгаагаа бидэнтэй хуваалцсан юм. Нийгмийн хариуцлагын хүрээнд “Дулаан шийдэл II” төсөлтэй хамтран ажиллаж, 2 айл өрхөд дулаалга хийх санхүүжилт олгосон Бодь Пропертийз ХХК-д талархаж байгаагаа Жэрэс ОУТББ-ын удирдлагууд илэрхийлж байв.
Өдөрлөгт оролцогчдоос МБҮА ТББ-ын Удирдах зөвлөлийн гишүүн, Эрчим инженеринг ХХК-ийн ерөнхий захирал М.Батболд: “Дулаалгын аян” өрнүүлж, “Утаагүй Монгол” үндэсний хөтөлбөр хэрэгжүүлэх шаардлагатай байгаа бөгөөд дулаалсан байшинд сэргээгдэх эрчим хүчний тоног төхөөрөмж суурилуулж, хүлэмжийн хийн ялгарлыг бууруулсны үндсэн дээр олон улсын зах зээлээс орлого олох боломжтой” болохыг онцолсон юм.
Нээлттэй өдөрлөгт Хот байгуулалт, барилга, орон сууцжуулалтын яам, Агаарын бохирдлыг бууруулах үндэсний хороо, Эрчим хүчний зохицуулах хороо, УИХ-ын гишүүн Г.Лувсанжамцын ажлын алба, Жэрэс ОУТББ, Бодь Пропертийз ХХК, Бульдорс мон ХХК, Н Эй Би ХХК, Фэйрви ХХК, Батлан хамгаалах яамны харьяа Барилга захиалагчийн алба, Эрчим инженеринг ХХК, БҮТИ ХХК, Дабль пирамид констракшн ХХК-ийн төлөөлөл оролцлоо.