Эрүүл мэндийн яамны Эс, эд, эрхтэн шилжүүлэн суулгах үйл ажиллагааг зохицуулах албаны даргаар ажиллаж байсан эмч П.Батчулууныг хүний эд, эрхтэн зөвшөөрөлгүй авсан гэм буруутайд тооцон, өнгөрсөн нэгдүгээр сарын 20-ны өдөр анхан шатны шүүх 2.6 жил хорих ял оноосон. Тэрээр уг шийдвэрийг эсэргүүцэн, давж заалдах шатны шүүхэд гомдол гаргасан юм.

Давж заалдах шатны шүүх хурал өнөөдөр /2025.03.13/ Нийслэлийн эрүүгийн хэргийн давж заалдах шатны шүүхэд болов. Эмч П.Батчулуун хүний цус, эс, эд, эрхтэн хууль бусаар авсан гэх хэргийг цагаатгаж, хэрэгсэхгүй болгож өгөхийг тус шүүхээс хүссэн байна.

Түүнийг нь давж заалдах шатны шүүх хэлэлцээд, П.Батчулуун эмчид анхан шатны шүүхээс оноосон 2.6 жил хорих ялыг хэвээр үлдээлээ. Эмч П.Батчулууны өмгөөллийн баг түүний хэргийг хэрэгсэхгүй болгох, цагаатгах байр сууринаас оролцсон ч давж заалдах шатны шүүх хүсэлтийг нь хүлээж авахаас татгалзжээ. П.Батчулуун эмчид прокурор М.Амарзаяа ял төлөвлөж, 1072 хуудас бүхий хавтаст хэргийг шүүгч Л.Дарьсүрэн дэнсэлжээ.

Эргэн санавал “Эмч нар бусдын эрүүл мэнд, амь насыг авран хамгаалсны төлөө хохирогч болох ёсгүй” гэж эмч, мэргэжилтнүүд ярьж байсан юм.