Засгийн газраас татвар хураамж, үнэ тариф нэмэхгүй гэдгээ зарласан. Гэвч Монгол улсын хүн амын тал хувь нь амьдардаг нийслэлд татвар нэмэгдэж байгаа. Засгийн газрын ам ажил зөрж байгаа энэ нөхцөлийг ЗГХЭГ-ын дарга Н.Учралаас тодруулав.

–Нийслэлд татвар нэмэгдчихлээ. Уг нь ЗГ татвар үнэ тариф өсгөхгүй гэсэн биз дээ?

– Засгийн газар татвар хураамж нэмэхгүй байх чиглэлийг гаргасан. Нутгийн өөрөө удирдах байгууллагууд засгийн газрынхаа чиглэлийг харж ажиллах учиртай. Цаашид хууль тогтоомж өргөн барихдаа татвар, төлбөр хураамж нэмэгдүүлдэг жишгийг арилгах шийдвэр гэсэн үг шүү дээ. Өмнө нь дулаан цахилгааны үнэ нэмэгдүүлсэн, мөн дулааны үнийг нэмэгдүүлнэ гэсэн энэ шийдвэрүүд гаргаснаа Эрчим хүчний зохицуулах хорооноос гаргасан. Үүнийг л хойшлуул гэдэг үүрэг өгөгдсөн гэсэн үг.

-Авто машины татварыг нэмэгдүүлж байгаа. Энэ татвар хураамжийн өсөлт биш гэж үү?

-Өнгөрсөн хугацаанд НИТХ хуралдаад гаргасан шийдвэр. Нэгэнт гарсан шийдвэр. Цаашид харин ийм шийдвэр гаргаж болохгүй гэсэн чиглэл гэж ойлгож болно. Бид нутгийн өөрөө удирдах байгууллагын шийдвэрийг шууд хүчингүй болгох үндэслэл байхгүй. Тэгэхээр засгийн газар чиглэл өгч байгаа учраас НИТХ ахин хуралдаж энэ шийдвэрээ эргэн харах хэрэгтэй.

-Хөдөлмөрийн хөлстэй уялдах төлбөр хураамжийн тухайд яах бол?

-Нутгийн өөрөө удирдах байгууллага өөрсдөө татвар хураамжаа нэмээд байдаг. Цаашид төр засаг нэгдмэл байр суурьтай байх учиртай. Тиймээс бүх шатны иргэдийн хурал ЗГ-аас өгч байгаа чиглэлийг баримталж ажиллах үүрэгтэй. Ахин хуралдаад төлбөр хураамж нэмсэн асуудлаа ахин хэлэлцээд эргээд засгийн газарт тайлагнах ёстой. Дэлхий дахинд эдийн засгийн сорилттой нөхцөл байдал үүсээд байна. Тиймээс энэ эдийн засгийн дарамтыг бид иргэддээ үүрүүлэх ёсгүй гэж үзэж ийм шийдвэр гаргасан. Тиймээс татвар хураамж энэ хүнд цаг үед нэмэгдэж болохгүй.

-Хэрвээ ИТХ-ууд ЗГ-ын өгсөн чиглэлийг хүлээн авахгүй бол яах вэ?

-ЗГ-ын шийдвэр зөвлөмжийг дагах ёстой. Шаардлагатай гэвэл бид шахаж шаардаж ажиллана.

-Татвар хураамжаа нэмэхгүй. Нүүрсний үнэ дэлхийн зах зээл дээр уначихлаа. Төсөвт тодотгол хийх шаардлага үүсэх үү?

-Төсөвт тодотгол хийх нөхцөл байдал үүсээгүй. Бид төсөвт зохицуулалт хийгээд явах бүрэн бололцоотой.