Аж ахуйн нэгж, иргэдийн аль алинд нь нийгмийн даатгалын шимтгэлийн хэмжээ хэт өндөр тусаж байгаа нь нууц биш. Тэгвэл төр засгаас нийгмийн даатгалын шимтгэлийн хувь хэмжээг бууруулах боломж бий эсэхийг МҮЭХ-ны Ерөнхийлөгч асан, УИХ-ын гишүүн С.Эрдэнэбатаас тодрууллаа.

– Нийгмийн даатгалын шимтгэл хэт өндөр байгаа тухай яригддаг. Бууруулах боломж бий юу?

-Манай улсын нийгмийн даатгалын шимтгэл тийм ч өндөр биш шүү дээ. Зарим улс оронд бүр 30-40 хувь хүртэл авдаг газар ч бий. Харин нийгмийн даатгалын мөнгийг хэрхэн оновчтой зөв зарцуулж, хэрхэн өсгөх вэ гэдэгт анхаарах нь чухал. Нийгмийн даатгалын сангийн мөнгийг хэт бага хүүтэйгээр банканд байршуулдаг жишээ бий. Сүүлийн жишээ гэхэд сая чуулган завсарласан байх хугацаанд 700 тэрбум төгрөгийг банканд хадгалсан. Ямар банканд хэний лоббигоор сангийн мөнгө оров гэдэгт бид хяналттай байх учиртай. Магадгүй маш олон банк энэ мөнгөний араас хөөцөлддөг байх. Бодлогын хүү 12 хувьтай байхад 9 хувийн хүүтэй байршуулдаг ч юм уу. Ингэж болохгүй шүү дээ. Хэрэв бодлогын хүү 12 хувь бол арилжааны банкнуудын хүү түүнээс өндөр. Нийгмийн даатгалын сангийн мөнгийг хэрэв банканд байршуулах бол арилжааны банкнуудын хүүгээр тооцох нь шударга. Ийм зүйлс дээр хяналттай байх ёстой. Хэн ямар эрх мэдлээр Нийгмийн даатгалын сангийн мөнгөөр ашиг хийгээд байдаг юм. Өмнө нь сангийн мөнгийг үрэн таран хийсэн жишээ хүртэл бий шүү дээ. Энэ асуудлыг бид орхиж болохгүй. Тухайн үед мөнгийг хэний санаачилгаар аль банканд хэрхэн байршуулсныг тогтоож, бид хариуцлага ярих л учиртай.

– Нийгмийн даатгалын сангийн мөнгө ирээдүйд Тэтгэврийн сангийн ачааллыг дийлэх үү гэдэг яриа гардаг. Энэ талаар?

-Нийгмийн даатгалын шимтгэлийн хэмжээгээр тэтгэврийн хэмжээ тогтоодог зохицуулалтыг бид эргэн харах учиртай. Цалингийн доод хэмжээгээр нийгмийн даатгалын шимтгэл төлж төлчхөөд тэтгэврийн насныхаа яг өмнөх хэдхэн жилд өндөр шимтгэл төлөөд өндөр тэтгэвэр авдаг шударга бус зохицуулалтыг бид өөрчлөх ёстой. Нийгмийн даатгалын шимтгэлийг нөхөн төлдөг өршөөлийг ч ахин баталж болохгүй. Үүнээс болж хүмүүс хэрэгтэй үедээ төлдөг шаардлагагүй бол төлдөггүй жишиг тогтсон шүү дээ. Хэрэв НДШ төлөхгүй бол тэтгэвэр байхгүй гэдэг зарчим үйлчлэх учиртай.

– Нийгмийг даатгалын шимтгэлийг аажимдаа бууруулах боломж огт байхгүй гэсэн үг үү?

-Нийгмийн даатгалын шимтгэлийг буулгахаас илүү үр өгөөжийг өсгөх талаар л анхаарах нь зүйтэй. Тэтгэврийг өвлөх асуудал бас яригдах учиртай. Залууст хандаж хэлэхэд нийгмийн даатгалын шимтгэлээ төлөхгүй байвал яасан юм гэдэг хандлага бол чи ирээдүйд тэтгэвэр авахгүй биз дээ гэдэгтэй агаар нэг.

– Баярлалаа.