Эх, хүүхдийн эрүүл мэндийн үндэсний төвийн нарийн мэргэжлийн эмч нарын баг энэ сарын 18 хүртэл Ховд аймагт ажиллаж байна. Эмч нар одоогоор 150 гаруй хүүхдэд үзлэг хийж, зөвлөгөө өгөн, 40 гаруй хүүхдэд мэс засал хийж байна. Голчлон хэвлий, цавь хуухнагийн эмгэгүүд, чих хамар хоолой, бөөр, зарим хавдрын хагалгаа хийх аж.
ЭХЭМҮТ-ийн эмнэлзүй эрхэлсэн тэргүүн дэд захирал, Гавьяат эмч Л.Ганбаяр тус багийг ахлан ажиллаж байна. Бүрэлдэхүүнд нь хүүхдийн мэс заслын их эмч, Гавьяат эмч А.Цэнджав, Чих, хамар, хоолойн тасгийн эрхлэгч, зөвлөх эмч, Гавьяат эмч Б.Дэлгэрмаа нарын 9 эмч багтжээ.

Тус баг Ховд аймаг дахь Бүсийн оношилгоо, эмчилгээний төвийн эмч нарт хүүхдийн нарийн мэргэжлийн 6 чиглэлээр ажлын байрны дадлагажих сургалт зохион байгуулж, эмч мэргэжилтний мэдлэг чадварыг дээшлүүлэн туршлагаа хуваалцаж байна.

Нарийн мэргэжлийн эмч нарын баг Засгийн газар, Эрүүл мэндийн яамнаас хэрэгжүүлж буй төвлөрлийг сааруулах бодлогын хүрээнд алслагдсан аймагт ажиллаж байгаа нь энэ юм. Ховд аймаг 12 дахь аймаг нь болж байгаа бөгөөд үүрэн холбооны “Скайтел” ХХК хамтран ажиллаж байгаа аж.