Монгол Улс, БНХАУ-ын Засгийн газар хооронд Гашуунсухайт-Ганцмод боомтын хил дамнасан төмөр зам, нүүрс худалдах, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай хэлэлцээрийг соёрхон батлах тухай хуулийн төслийг өргөн барилаа. Уг хэлэлцээр батлагдсанаар Монгол улсын урд хөрш рүү экспортлох нүүрсний хэмжээг 5 сая тонноор нэмэгдүүлж төсвийн орлогыг 400 сая ам доллароор өсгөх бололцоо бүрдэх гэнэ. 2025 оны төсөвт 83 сая тонн нүүрс экспортод гаргана гэсэн төлөвлөгөө бий. Өнөөдөр өргөн барьж байгаа хэлэлцээр батлагдвал 2025 онд 88 сая тонн нүүрс гаргана гэсэн үг. Гэхдээ Эрдэнэс таван толгой компани дангаараа ийм хэмжээний нүүрс гаргаж дийлэхгүй учраас нүүрс олборлож тээвэрлэх шинэ эх үүсвэрийн асуудал яригдах таарах нь.

Түүнчлэн Монгол улсын засгийн газрын төлөвлөж байгаа 14 мега төслийн 1 болох Гашуунсухайт-Ганцмод боомтын төмөр замыг холбох хил холболтын төмөр замын бүтээн байгуулалтын тендерийг энэ сард зарлахаар төлөвлөжээ.

Төмөр зам ашиглалтад орсноор Монгол Улсын боомтын хүчин чадал хоёр дахин нэмэгдэж, нүүрсний экспорт жилд дунджаар 83 сая тонн байгаагаас 165 саяд хүрч, нүүрс борлуулалтын орлого жилд 1.5 тэрбум ам.доллароор нэмэгдэж, нэг хүнд ногдох ДНБ-ий хэмжээ 10,000 ам.долларт хүрэх зорилт биелэх гэнэ.