Шинэ өнгө төрх бүрдүүлнэ, таны нүүрийг төгс болгоно гэх уриатай гоо сайхны салон, мэс заслын эмнэлгүүд хар зах шиг олширлоо. Бараг л орон сууц, байр болгоны үүдэнд нэг салон нээгдчихэж. Үүнийг дагасан олны танилуудын зар сурталчилгаа ч хэрээс хэтэрч байх шиг.

 Давхраа оёулсан, гэдэсний өөхөө хөхөндөө хийлгэсэн, филлер тарилга шахуулж, хамраа өндөрлүүлсэн, нүүрний арьсаа солиулсан гээд л. Хүн өөрийгөө гоёж гоодох, хөөрхөн сайхан болох нь хувь хүний асуудал. Гэвч сүүлийн бүлэгт харахад нүд халтирам хагалгааны дараах зургууд, хамаргүй, хараагүй, хөгжлийн бэрхшээлтэй болсон эмэгтэйчүүдийн пост сэтгэл түгшээх боллоо. 

Хэд хэдэн эмнэлгээс охид, эмэгтэйчүүд ямар эмчилгээ голлон хийлгэдэг талаар асуув. Ихэнх нь давхраа оёулах, хамар, нүүрний филлер шахуулдаг гэв. Мэдээж хэрэг хүний нүүрэнд тарилга тарих, мэс ажилбар хийхэд мэргэжлийн эмч байх шаардлагатай. Гэвч манай улсад мэргэжлийн гэх тодотголтой, мэргэшсэн бус эмч нар ажиллаад байна уу гэх хардлага төрөхөөр олон жишээ гарч байна. Бидний сайн мэдэхээр дуучин Г. Эрдэнэтунгалаг давхраа оёулах мэс ажилбар хийлгэснээр харах чадвараа алдаж, 6 сарын турш гэртээ хүний гарт байсан тухайгаа ярьж байсан билээ. 
Гоё сайхан болохыг хүсдэггүй эмэгтэй хүн үгүй. Гэвч эхлээд үйлчлүүлэх гэж байгаа эмнэлгийнхээ талаар судлах, олны танил инфлүнсерүүдийн үгэнд итгэхгүй байх,  эмч нартай нь биечлэн уулзах хэрэгтэйг сануулсан хохирогчдын яриаг хүргэж байна. 

Хохирогч 1 

Би нүүрэндээ филлер тарилга хийлгэсэн. Мэргэжлийн баг хамт олонтой, захирал нь 10 орчим гадаадын сургууль, курс төгссөнөө вэбсаит дээрээ зарласан, итгэж болохоор үйлчилгээтэй, мэргэжлийн мэт харагдсан учраас очсон. Тухайн эмнэлгийн эмч энэ тарилгыг хийлгэвэл үр дүнтэй гэж зөвлөсөн. Одоо би насан туршдаа хөгжлийн бэрхшээлтэй, харааныхаа 65%-ийг алдсан, баруун талаа харалгүй биеэ цохидог, маш хурдан ядардаг, хөдөлмөрийн бүтээмжгүй, зүүн тархины судасны агшилтаас болж толгой маш их өвддөг. Үлдсэн зүүн нүдний хараа сүүлийн 2 жилд огцом муудсан, хэцүүхэн хүн болсон. Хэн ч сохорно гэж мэдсэн бол филлер тарилга хийлгэхгүй.

Хохирогч 2 

“Миний хамар хэтэрхий намхан, үзүүр нь бага зэрэг унжуу учир мэсийн аргаар өөрчлөхөөр шийдсэн. Миний орсон эмнэлэг үнэ, орчноос гадна олон дагагчтай. Охид, эмэгтэйчүүд хамар, хөх хийлгэсэн зургаа цахим сүлжээнд байршуулж, тухайн эмнэлгийг хүмүүст санал болгоод байсан учир баталгаатай гэж итгэсэн. Ингээд хамар өндөрлөх, хамрын үзүүр шөвийлгөх хагалгаанд ороод, долоо хоногийн дараа оёогоо авахуулав. Гэвч оёо авахуулсны маргааш нь нүүр тэр чигтээ хавдаад сэрсэн. Мэс засал хийлгэсэн эмнэлэгтээ очоод үзүүлтэл цус хурсан байна гээд хамраас цус аваад, антибиотик уухыг зөвлөсөн. Байдал дээрдэхгүй байсан учир дахиад эмчдээ хандтал “Эдгэрэх явцдаа угаасаа ийм болдог. Чи хэтэрхий бааштай байна” гэж зандардаг юм байна. Ингэж явсаар сар орчмын дараа өөр эмнэлэгт үзүүлтэл хамрын үзүүрийн мөгөөрс үрэвсээд, үхэжсэн байна гэж хэлсэн. Мэс засал хийлгэсэн эмнэлэгтээ очоод, учир байдлаа хэлтэл “Чи өөрөө гам бариагүй байна. Дархлаа чинь сул байж” гэх зэрэг тайлбар хэлээд халгаагаагүй. 

Хохирогч 3

“Гоо сайхны эмнэлэгт хамар болон уруулын филлер тариулахаар очсон. Хамартаа филлер тарилга хийлгэх үед нүд  бүрэлзэж эхэлсэн. Эмчдээ хэлэхэд “Танд харшилж байна. Удахгүй зүгээр болно” гэж хэлсэн ч тун удалгүй миний баруун нүд юм харахгүй болсон тул өөр эмнэлгээс эмч дуудаж, филлер хайлуулах тариа хийгээд, намайг явуулсан. Маргаашаас нь Гэмтэл, согог судлалын үндэсний төвөөс эхлээд Монголд үйл ажиллагаа явуулж байгаа бүхий л эмнэлгүүдэд хандсан боловч өмнө нь ийм тохиолдол таарч байгаагүй тул эрсдэлтэй гэж үзэн, намайг хүлээн авах эмнэлэг олдоогүй. Эцэст нь хамрын филлер хийлгэснээс болж хараагаа алдаж, тархинд уйланхай үүссэн гэдэг онош тогтоогдсон” гэлээ. 

Гоё сайхан болох гэж очсон ч эрүүл мэндээрээ хохирч, зарим нь насан туршдаа хөдөлмөр эрхлэх чадваргүй, хөгжлийн бэрхшээлтэй болжээ. Мөн олон дагагчтай, инфлүнсер гэх хүмүүсийн реклам, сурталчилгааг үзэж, сайн гэсэн эмнэлэг болгонд очдог байдлаа зогсоох хэрэгтэйг сануулж байна. Олны танил, одод ч гэсэн энэ асуудалд анхаарч, баталгаа, нотолгоотой гоо сайхны бүтээгдэхүүн, мэргэжлийн байгууллага, хамт олныг сурталчилдаг байх тал дээр анхаарвал зохих юм. 

Ёстой л дураараа дургиж, дунд чөмгөөрөө жиргэнэ гэдэг шиг толгойтой болгон нь салон нээж, хүний нүүр илж суудаг болсон цагт, тусгай зөвшөөрөл, эмч ажилчдын мэргэшсэн байдалд хатуу хяналт тогтоож байх ёстой байгууллагууд ажлаа хийе. Гоо сайхны салбарт үйл ажиллагаа эрхлэх зөвшөөрлийг эрх зүйн хүрээнд чангатгаж, хууль бусаар үйл ажиллагаа явуулсан газруудад хатуу хариуцлага тооцдог болъё. Худлаа үнэн гоо сайхны салон, эмнэлэг нэртэй газруудаас болж, охид, эмэгтэйчүүд  эрүүл мэндээрээ хохирч дуусах нь.