Сэтгүүлч Н.Өнөрцэцэгийг баривчилж саяхныг хүртэл хорьсон, өнөөдөр Ноорог.мн сайтын залуусыг байцааж үйл ажиллагааг нь хаасан зэрэг нь Монгол улсыг ардчилсан улс мөн үү гэсэн эргэлзээг олон улсад бий болгох сөрөг нөлөөтэйг сэтгүүлч, судлаачид өөрсдийн цахим хуудсаараа илэрхийлсээр байна. 2024 онд Монгол улс хэвлэлийн эрх чөлөөний индексээр ухарч 109-р байранд орсон нь түүхэн доод үзүүлэлт юм. 2023 оноос 24 байраар ухарсан энэ үзүүлэлтэд олон хүчин зүйл нөлөөлдөг төдийгүй сэтгүүлчдийг барьж хорьж байгаа үйл явдал хүчтэй нөлөөлдөг. Сүүлийн 10  жилийн хугацаанд хэвлэлийн эрх чөлөөний индексээр 55 байраар ухарсан нь Эрүүгийн хуульд багтсан гүтгэх, доромжлох зүйл заалттай шууд холбоотой хэмээн үзэх байр суурь байна. Зөвхөн энэ заалтаас болж жил бүр 2-3 сэтгүүлч байцаагдаж шалгагдаж байгаа тухай статистик байгаа юм. Өнөөдөр шуугиан тариад байгаа Ноорог.мн-ий залууст үүсгээд байгаа хэрэг Монгол улсын хэвлэлийн эрх чөлөөний индексийг 2025 онд ч ахиад хойшлуулах нөхцөлийг бүрдүүлж мэдэх нээ.