Нийслэлийн Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх Д.Кёкүшюзанбатбаяр, Т.Баясгалан нарт холбогдох хэргийг уржигдар шүүн хэлэлцээнд, гэмт хэргийн шинжгүй гэж үзэн хэрэгсэхгүй болгосон. Харин тэдэнтэй хамт шалгасан Б.Цэрэндоржид 6 жил хорих ял оноожээ.

Улсын яллагч Эрүүгийн хуулийн ерөнхий ангийн 1.8 дугаар зүйлийн 3, 1.9 дүгээр зүйлийн 1, 3.1 дүгээр зүйлийн 1, 3.2 дугаар зүйлийн 1 дэх хэсгүүдэд заасныг журамлан мөн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад зааснаар Бөнтөгийн Цэрэндоржид холбогдуулан яллах дүгнэлт үйлдэж, хэргийг нь шүүхэд шилжүүлсэн аж. Түүнийг буруутгаж буй хуулийн зүйл, хэсэг, заалт шүүгдэгчийн гэм буруутай үйлдэлд тохирсон, хэргийн талаар нотолбол зохих байдлуудыг хуульд заасан үндэслэл журмын дагуу шалгаж тодруулсан гэж шүүх үзсэн байна. Түүнийг дээрх гэмт хэргийг үйлдсэн гэм буруутайд тооцож, 6 жил хорих ял оногдуулжээ. Эрүүгийн хуулийн ерөнхий ангийн 5.6 дугаар зүйлийн 3, 4 дэх хэсэгт “…Энэ хуульд заасан гэмт хэрэг үйлдсэн хүнийг 6 сараас 20 жил нээлттэй, эсхүл хаалттай хорих байгууллагад тусгаарлаж, хугацаатай хорих ялыг эдлүүлнэ…” гэж, 4 дэх хэсэгт “…Шүүх гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдлыг харгалзан хугацаатай хорих ялыг нээлттэй, эсхүл хаалттай хорих байгууллагад эдлүүлэхээр тогтооно…” гэж заасны дагуу шүүгдэгч Б.Цэрэндоржийн эдлэх хорих ялыг нээлттэй хорих ангид эдлүүлэхээр шийдвэрлэсэн байна.

Нийслэлийн Прокурорын газар Эрүүгийн хуулийн ерөнхий ангийн 1.9 дүгээр зүйлийн 1, 2.2 дугаар зүйлийн 3, 3.1 дүгээр зүйлийн 1, 3.3 дугаар зүйлийн 1, 3.5 дугаар зүйлийн 1 дэх хэсгүүдэд заасныг журамлан мөн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалт, Эрүүгийн хуулийн ерөнхий ангийн 2.2 дугаар зүйлийн 3, 3.1 дүгээр зүйлийн 1, 3.3 дугаар зүйлийн 1 дэх хэсгүүдэд заасныг журамлан, мөн хуулийн тусгай ангийн 18.6 дугаар зүйлийн 1 дэх хэсэгт тус тус зааснаар Даваагийн Батбаярт яллах дүгнэлт үйлдэж, хэргийг нь тус шүүхэд шилжүүлсэн.

Эрүүгийн хуулийн ерөнхий ангийн 1.9 дүгээр зүйлийн 1, 2.2 дугаар зүйлийн 3, 3.1 дүгээр зүйлийн 1, 3.3 дугаар зүйлийн 1, 3.2 дугаар зүйлийн 1 дэх хэсгүүдэд заасныг журамлан мөн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад зааснаар, мөн Эрүүгийн хуулийн ерөнхий ангийн 2.2 дугаар зүйлийн 3, 3.1 дүгээр зүйлийн 1, 3.2 дугаар зүйлийн 1 дэх хэсгүүдэд заасныг журамлан мөн хуулийн тусгай ангийн 18.6 дугаар зүйлийн 1 дэх хэсэгт зааснаар Түвшинжаргалын Баясгаланд холбогдуулан яллах дүгнэлт үйлдэж, хэргийг нь шүүхэд шилжүүлсэн.

Хэрэгт цугларсан баримтуудаар Д.Батбаяр, Т.Баясгалан нар уг гэмт хэрэгт санаатайгаар хамтран оролцсон гэдэг нь тогтоогдоогүй гэж шүүх үзэн, хэргийг нь хэрэгсэхгүй болгон цагаатгажээ.

Эрүүгийн хуулийн ерөнхий ангийн 1.8 дугаар зүйлийн 3, 1.9 дүгээр зүйлийн 1, 3.1 дүгээр зүйлийн 1, 3.2 дугаар зүйлийн 1 дэх хэсгүүдэд заасныг журамлан мөн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад заасан хэрэгт Нүрзээгийн Болормааг буруутган, прокурор яллах дүгнэлт үйлдэж, хэргийг нь шүүхэд шилжүүлсэн юм. Түүнд холбогдох хэргийг шүүх шүүн хэлэлцээд, уг гэмт хэргийг үйлдсэн гэм буруутайд тооцжээ. Гэвч гэмт хэргийг хөөн хэлэлцэх хугацаа дууссаны дараа түүнд эрүүгийн хэрэг үүсгэж, яллагдагчаар татсан гэж үзэн, хэргийг нь хэрэгсэхгүй болгожээ.

Энэхүү 4 хүнд холбогдох хэргийг 2023.04.06-нд нийслэлийн Хан-Уул дүүргийн Эрүүгийн хэргийн анхан шатны шүүх хэлэлцэж, гэмт хэргийн шинжгүй гэсэн үндэслэлээр хэрэгсэхгүй болгож, шүүгдэгч нарыг цагаатгасан байдаг. Нийслэлийн Прокурорын газар уг шийдвэрийг эсэргүүцэж, Нийслэлийн эрүүгийн хэргийн давж заалдах шатны шүүхэд эсэргүүцэл бичсэн юм. Давж заалдах шатны шүүх прокурорын эсэргүүцлийг хүлээн авч, энэ хэргийг дахин хэлэлцсэн нь энэ. Гэсэн ч Д.Батбаяр, Т.Баясгалан, Н.Болормаа нарт холбогдох хэргийг хэрэгсэхгүй болгож, Б.Цэрэндоржид 6 жил хорих ял оноолоо.