Монголын сагсан бөмбөгийн холбооны Үндэсний дээд лигийн 2024-2025 оны улирлын плэй-офф шатанд өрсөлдөх 4 баг эцсийн байдлаар тодорлоо. Өчигдөр О.Мөнхжин эзэнтэй “SG Apes” баг “Эрдэнэт Майнерс” багийг хожсоноор 4:2 харьцаатай плэй-оффын дараагийн шатанд шалгарлаа. Ийн “Бишрэлт металл”, “Хасын хүлгүүд”, “Сэлэнгэ бодонс”, “SG Apes” баг дараагийн шатанд өрсөлдөнө.
Учрааны хувьд “Бишрэлт металл”, “SG Apes” багийн эсрэг тулах бол “Хасын хүлгүүд”, “Сэлэнгэ бодонс” багтай өрсөлдөх юм. Үүнээс аваргаа хамгаалагч хүлгүүд, ааштай эзэрхэг Казинсаар хүч нэмсэн “Сэлэнгэ бодонс” багийн учраа үзэгчдийн анхаарлыг татаж байна.
Хүлгүүдийн тухайд улирлын турш лигийн хүснэгтийг тэргүүлж, плэй-оффын шатнаа лигт хоёр дахь жилдээ залуу тамирчдаар багаа бүрдүүлэн өрсөлдсөн “Дархан юнайтед” багтай таарч, 4:1 харьцаагаар хожсон. Харин нөгөө талд улирлаа тавдугаар байраар өндөрлүүлж, “BCH Knight” багтай таарсан “Сэлэнгэ бодонс” 4:1 харьцаагаар өрсөлдөгчөө ялснаар ийн лигийн хамгийн хүчирхэг баг гэгддэг “Хасын хүлгүүд”-ийн эсрэг тулахаар боллоо. Хоёр багийн эхний тоглолт маргааш буюу Баасан гарагт 19:10 цагаас эхэлнэ.
Хоёр багийн тоглолтын тухай сагсан бөмбөг сонирхогчид цахим орчинд таамгаа хэдийнэ дэвшүүлээд эхэлсэн.” Аваргаа хамгаалагч “Хасын хүлгүүд” бодонсуудыг 4:1 ээр хожиж, аваргын төлөө өрсөлдөнө. Багийн тоглолт ямар байдаг гэдгийг утгаар нь харуулна” гэхчлэн олон таамаг өрнөж байна.
Багийн тоглолтын тухайд “хүлгүүд” илүүрхэх нь гарцаагүй байх. Тус баг бүрэлдэхүүн зузаан, чадварлаг, ухаалаг, залуу тоглогчидтой багаараа жигд сайн тоглодог. Багийн лидер гавьяат Б.Билгүүн, холбон тоглогч О.Сэргэлэнг мартаж болохгүй. Мөн энэ улирлын “Үнэ цэнтэй” тоглогч болон “Шилдэг хамгаалан тоглогч”-ийн шагналыг хүртэж, хамгийн залуудаа буюу 19 настайдаа хоёр гол шагналын эзэн болсон А.Азбаяр, Ч.Ихбаяр, Ч.Тэмүүлэн гээд залуу тоглогч хүлгүүдийг хожилд хүргэж буй. Үүнээс гадна Жордан Толберт ч үүргээ сайн биелүүлж, багтаа тус нэмэр болж байгаа билээ.
Мөн багийн ахлах дасгалжуулагчаар Željko Vasiljević ажиллаж буй. Тэрээр энэ улирлын “Шилдэг дасгалжуулагч”-аар шалгарсан. Өнгөрсөн жил багаа аварга болгож чадсан туршлагатай дасгалжуулагч. Түүний дасгалжуулалтын тактик, арга барил нь маш сайн. Хэдэн оноогоор хожигдож явсан ч Хүлгүүд маш хурдан сэргэж, тоглолтын хэмнэлийг өөрчилдөг. Энэ ч утгаараа 19:6 гэсэн амжилтаар улирлаа дуусгаж, лигийн хүснэгтийг тэргүүлсэн.
Тэгвэл тэдний эсрэг НБА-ын од ДеМаркус Казинсаар хүч нэмсэн “Сэлэнгэ бодонс” хэрхэн тоглох вэ?
Цагтаа 50 оноог төвөггүйхэн авдаг байсан ДеМаркус Казинс “Сэлэнгэ бодонс” багтай нэгдсэн. Монголд ирсэн зорилго нь багаа аварга болоход нь туслах гэдгийг Казинс хэлсэн. Ямартай ч зорилгынхоо 40 хувийг биелүүлж, багийнхаа хамт плэй-оффын дараагийн шатанд шалгарлаа. Ясны мэргэжлийн тамирчин ямар байдгийг Бүүгий утгаар нь харуулж буй.
Харин түүний тоглолтод багийнхан нь хэр тусалж байгаа нь хамгийн чухал. Хөндлөнгөөс харахад сая “BCH Knight”-ын эсрэг Казинс нэг их хүч гаргаж тоглоогүй юм шиг санагдсан. Тоо тэнцсэн эгзэгтэй мөчид тэр багаа чирээд, хожилд хүргэж байв. Чөлөөт шидэлтээ бараг 100 хувийн гүйцэтгэлтэй, алдаагүй шиддэг түүнд гагцхүү тусалж, дэм болох багийн тоглогчид чухал байна.
Энэ үүргийг “Сэлэнгэ бодонс”-оос О.Тулга, Н.Батбаяр нар гүйцэтгэж байгаа юм. О.Тулгын хувьд өнгөрсөн улиралд “Амжилт нь ахисан тоглогч”-ийн шагнал хүртсэн юм. Энэ жилийн плэй-оффын тоглолтод тэр маш сайн тоглож байгааг олон нийт харсан биз ээ. Өөртөө итгэлтэй, зоримог довтолгоонууд нь Казинсын сэтгэлд хүрч байгаа нь хэд хэдэн удаа цэнхэр дэлгэцээр харагдсан.
Мөн Кан буюу Н.Батбаяр ч өөрийнхөө хэмжээнд сайн тоглож буй. Одоогоор О.Тулга, Н.Батбаяр нар Казинсын баруун, зүүн гар болж байна. Гэсэн ч сагсан бөмбөг багийн спорт учраас багаараа жигд, сайн байж амжилт гаргана.
Бүүгий өөрийн үүргээ тултал нь биелүүлнэ. Аварга болох нь түүний энд ирсэн гол шалтгаан. Харин ардаас нь үүргээ тултал биелүүлэх нь “Сэлэнгэ бодонс”-ын анхаарах зүйл. Нэг хэсэг дуулиан, шуугианы гол эзэн болсон А.Базаргүр самбар дор сайн тоглож байгаа. Үзэгчид түүнээс улам их зүйл хүлээсээр. Нөгөө талд Ц.Сэргэлэнбаатар, Б.Батзолбоо нарын тамирчин тоглолтоо жигд болгож, багтаа хувь нэмэр оруулах нь маш чухал байна.
Хоёр импорт тоглогчийн нэгийг хасах сонголтод тунаж үлдсэн Ахмад Гилберт плэй-оффын эхний шатанд төдийлөн сайн тоглосонгүй. Хамгийн сүүлийн тоглолтод тэрээр нуруугаараа хүчтэй унаж, талбайг чөлөөлсөн. “Дараагийн тоглолтод нөлөөлөхөөргүй хөнгөн гэмтэл байгаасай” хэмээн хөгжөөн дэмжигчид нь харж байгаа. Уг нь Ахмадын гурвын зайн шидэлт, дайчин байдал нь багт нь маш чухал нөлөө үзүүлдэг. Тиймээс тоглолтоо 100% гаргаж Казинстай хамт багаа хожилд хөтлөхөд нь туслах хэрэгтэй.
Ерөнхийдөө энэ цувралд “Хасын хүлгүүд”-ийг хожно гэсэн хүн олон байгаа ч олимп, Дэлхийн аваргаар хүч нэмсэн “Сэлэнгэ бодонс”-ыг дутуу үнэлж, басаж болохгүй ээ. Шийдвэрлэх тулаан яг одоо эхлэх гэж байна. Предраг Стояансев дасгалжуулагч “Хасын хүлгүүд”-ийн эсрэг ямар тактик гаргасныг харах үлдлээ. Аваргаа хамгаалагч “Хасын хүлгүүд” үү, аварга болох зорилготой “Сэлэнгэ бодонс” уу. Тулаанд хэн ялахыг мэдэхэд хэдэн өдөр үлдлээ.