Улаанбаатар хотын Захирагчийн ажлын албанаас энэ жил нийслэлийн хэмжээнд нийт зургаан удаагийн их цэвэрлэгээг зохион байгуулахаар төлөвлөжээ. Тэгвэл ээлжит бүх нийтийн их цэвэрлэгээг маргааш эхлүүлэхээр болжээ. 21 хоног үргэлжлэх энэ удаагийн их цэвэрлэгээг гурван үе шаттай зохион байгуулах гэнэ. Эхний ээлжид ногоон байгууламж болон автобусны буудалд чийгтэй цэвэрлэгээг хийх юм байна. Харин дараа нь аж ахуй нэгж, байгууллагын ойролцоох 50 метр талбайг цэвэрлэнэ. Хамгийн сүүлд нь иргэд, ААН, холбогдох агентлаг, газрын албан хаагчдыг цэвэрлэгээнд хамруулах аж.

Хаврын их цэвэрлэгээг иргэдийн аюулгүй орчинд амьдрах эрхийг хамгаалах, хаврын улирлын тоос шорооноос сэргийлэх зорилгоор зохион байгуулдаг. Энэ жил гудамж, талбай, ногоон байгууламж, автобусны буудалд чийгтэй цэвэрлэгээг түлхүү хийх төлөвлөгөөтэй байна. Үүнээс гадна иргэдийг аюулгүй зорчуулах зорилгоор золбин нохой, муурыг устгах ажлыг эрчимжүүлжээ.