Төв цэнгэлдэх хүрээлэнгийн захиргаа МҮБХ-той уулзаж наадмын зүлэг ногоон дэвжээний стандартын тухай ярилцлаа. Үндэсний бөхийн холбооноос барилдааны зүлэг ногоон дэвжээний хуванцар зүлэгт бөхчүүд төдийгүй засуулууд сэтгэл дундуур байна. Хуванцар зүлгээс хурц үнэр үнэртдэг төдийгүй наранд халахаараа гутлын улнаас халдаг. Хоолой сөөлгөдөг сөрөг нөлөөтэй гэнэ. Түүнчлэн хиймэл зүлэг халтирдгаас болж олон бөхчүүд халтирч унаж бэртжээ. Зарим бөхчүүдийн бэртэл өнөөдөр ч эдгээгүй байна. МҮБХ-оос зүлгийн стандарт хангагдаагүйгээс бөхчүүд барилдах арга техниктээ бүрэн анхаарч барилдах бололцоо бүрддэггүй гэж мэдэгдэж байгаа юм.

Бөхчүүдийн зүгээс хиймэл хуванцар зүлэг биш амьд зүлгэн дээр барилдах хүсэлтэй байна. Түүнчлэн үндэсний бөх барилдах хиймэл зүлэг хөлбөмбөгийн цагаан зураастай нь барилдах бөхчүүдэд ч тэр үзэж байгаа үзэгчдэд ч тэр сэтгэл зүйн хувьд таагүй мэдрэмж төрүүлдэг тухайгаа ярьж байна.

Харин Төв цэнгэлдэх хүрээлэнгийн удирдлага Ж.Энхжаргалангийн зүгээс Төв цэнгэлдэх хүрээлэнд Үндэсний баяр наадмаас бусад өдрүүдэд урлаг соёлын олон арга хэмжээ зохион байгуулдаг учраас хиймэл зүлэг дэвсэхээс өөр аргагүй гэдэг тайлбартай байна. Гэхдээ МҮБХ-оос гаргаж байгаа хүсэлтүүдийг хүлээн авч ажилдаа тусгаж ажиллана гэж мэдэгдлээ.

МҮБХ-оос өнгөрөгч 2024 оны наадмын нээлтийн тайз бөхийн зүлэг ногоон дэвжээний стандартыг алдагдуулж тухгүй орчин бүрдүүлсэн гэдэг гомдолтой байна. Энэ талаараа МҮБХ-оос холбогдох байгууллагуудад гомдол гаргана гэлээ.