Монголын сагсан бөмбөгийн холбооны Үндэсний дээд лигийн плэй офф-ын хагас шигшээ шатны тоглолтууд өнгөрөгч Пүрэв гарагаас эхэллээ. Хагас шигшээ шатны тоглолтыг “Хасын Хүлэгүүд” “Сэлэнгэ Бодонс” багууд эхлүүлсэн. Эхний тоглолтод аваргаа хамгаалагч Хүлэгүүд хожиж цувралыг 1:0 болгосон.

Тэгвэл өчигдөр цувралын хоёр дахь тоглолтод “Сэлэнгэ бодонс” баг 97:83 харьцаагаар аваргуудыг хожиж, цувралыг тэнцүүллээ. Энэ тоглолтод “Хасын Хүлэгүүд”-ээс Б.Барсболд эсрэг багийн тамирчин Н.Батбаярыг түлхэж унагаасан. Үүний дараа мөн Ахмад Гилберт рүү дайрч, мөргөсөн. Энэ үед шүүгч хоёр тоглогчид техникийн алдаа өгч, улмаар Б.Барсболд талбайг чөлөөлсөн нь тус тоглолтын анхаарах нэг зүйл байв.

Тэгвэл цувралыг тэнцүүлж, плэй-оффын анхны хожлоо авсны дараа хувцас солих өрөөнд ДеМаркус Казинс багийнхандаа хандаж хоёр зүйл хэлсэн байна. Энэ талаар тус багийн эзэн Л.Наранбаатар цахим хуудаснаа нийтлээд байна.

#DeMarcusCousins багийхандаа ингэж хэлэв!

Л.Наранбаатар: Өчигдөр цувралыг 1:1 болгож тэнцүүлсний дараа миний бие багийнхандаа амжилт хүсэхээр хувцас солих өрөөнд орсон юм. Бүүгий маань багийнхандаа хандаж хоёр зүйл хэлсэнийг энд үнэхээр бичмээр санагдлаа.

DeMarcus Cousins: Бид алдаагаа засаж цувралыг тэнцүүллээ! Үүнд баярлаж, хөөрөх хэрэггүй. Өрсөлдөгч маш хүчтэй! Хоёр зүйл анхааруулъя!

Нэг: “Бид хэдэн ч оноогоор хожиж, хожигдож явж болно! Эцсийн секунд дуустал тэмцэх хэрэгтэй! Эрчээ сулруулж, өрсөлдөгчид боломж олгож болохгүй!

Хоёр: Тэд биднийг шатааж, бохир тоглож байна. Гэмтээж ч болзошгүй! Тиймээс талбай дээр болгоомжтой бай! Бие биендээ хайртай бай! Бид амь нэгтэй байж, өөрсдийгөө талбай дээр хамгаалж, бие биедээ туслах ёстой!” хэмээжээ.