Дундговь аймгийн төрийн байгууллагуудын болон сумдын удирдлагуудын шуурхай хурал болж, Цагдаагийн газраас тээврийн хэрэгслийн бодит жингийн зөвшөөрөгдөх дээд хэмжээг зөрчсөн зөрчилтэй тээврийн хэрэгсэлд хяналт тавих чиглэлээр зохион байгуулсан ажлыг танилцуулав. Нэгдүгээр сарын 22-оос хоёрдугаар сарын 22-ны байдлаар 560 тээврийн хэрэгсэлд хариуцлага тооцож, 119 тээврийн хэрэгслийн зөрчлийг арилгуулж, шилжүүлсэн бол 42 тээврийн хэрэгслийг Улаанбаатар хот руу буцаасан байна. Харин хоёрдугаар сарын 22-оос гуравдугаар сарын 23-ны байдлаар 144 тээврийн хэрэгсэлд хариуцлага тооцож, 175 зөрчлийг арилгуулж, шилжүүлсэн бол 29 тээврийн хэрэгслийг буцаажээ.
Үүнтэй холбогдуулан, Зам, тээврийн яам тээврийн хэрэгсэл, ачааны машины стандартыг жолооч нараар мөрдүүлэх арга хэмжээ авч эхэллээ. Төв, Өмнөговь аймаг мөн хяналтын цэгүүд гарган, ачааны машины даац, бодит жинг хянаж эхэлжээ.

Тээврийн хэрэгслийн бодит жингийн зөвшөөрөгдөх дээд хэмжээг зөрчсөн зөрчилтэй тээврийн хэрэгсэлд хяналт тавих ажлыг үргэлжлүүлэн зохион байгуулахаар уг хурлаас шийдвэрлэв. Зөөврийн пүү яаралтай авч, стандартаар баталгаажуулан, ажиллуулах, маршрутын бус замаар зорчиж байгаа тээврийн хэрэгсэлд хяналт тавих үүрэг, чиглэл өглөө.