УИХ-ын гишүүнээр ажиллаж байгаад ахин сонгогдоогүй гишүүдэд төсвөөс бүтэн жилийн хугацаанд сар бүр тэтгэмж урамшуулал олгодог. Тэгвэл өмнөх 76 гишүүнтэй парламентын гишүүдээс ахин сонгогдоогүй гишүүд өнөөдөр тэтгэмж авч байгаа гэсэн үг. Парламентын гишүүдийг чөлөөлөгдсөний дараах 12 сард олгодог тэтгэмжийг аль 1992 оны УИХ-ын хууль болоод 1997 оны УИХ-ын гишүүний эрх зүйн байдлын тухай хуулиудад энэ зохицуулалт багтсан байна. Түрүүчийн парламентаас Д.Тогтохсүрэн, Б.Баярсайхан, М.Оюунчимэг нарын өөр ажил албан тушаалд томилогдсон гишүүдэд олгох тэтгэмжийг зогсоожээ. Одоогийн байдлаар 2020-2024 онд бүрэн эрхээ хэрэгжүүлж байсан парламентын 20 гаруй гишүүд энэ төрлийн тэтгэмжийг үргэлжлүүлэн авч байгаа мэдээлэл байна.   Тэтгэмжийн хэмжээ нь УИХ-ын гишүүн байхдаа авдаг байсан сарын бүтэн цалинтай тэнцэх хэмжээний мөнгө байдаг. 76 гишүүнтэй сүүлийн парламентын гишүүдийн цалин 4 сая хүртэлх төгрөг. Тэгэхээр ажлаа өгсөн өмнөх их хурлын гишүүд улсын төсвөөс жилийн хугацаанд тус бүрдээ 48 сая төгрөгийн тэтгэмж авах юм.