Японы нийслэл Токио хотын дүүргийн шүүхээс Эв нэгдлийн сүм буюу Мүүний гэдгээрээ алдартай шашны байгууллагын татвараас чөлөөлөгдөх эрхийг нь цуцлаж, хөрөнгийг нь татан буулгах шийдвэрийг мягмар гарагт гаргажээ.

Дээрх шийдвэрийг Япон улсын Боловсрол, соёлын яамнаас 2023 онд гаргасан гомдлын дагуу гаргасан бөгөөд Мүүний сүмийг дагагч олноо айдаст автуулан, улмаар шүтлэгтэн олноосоо үлэмж их хэмжээний хандивыг хууль бусаар цуглуулж, хандивын мөнгийг үнэтэй эд зүйлс худалдаж авахад зарцуулсан гэх үндэслэлээр буруутган хөрөнгийг нь татан буулгах шийдвэрийг гаргасан бол Мүүний сүмийн зүгээс давж заалдана гэдгээ мэдэгдсэн байна.

Японы Боловсрол, соёлын яамны зүгээс дээрх хэрэгтэй холбогдуулан гэр бүлийнх нь гишүүд Мүүний сүмийн хохирогч болсон 170 гаруй хүнээс мэдүүлэг авсны үндсэн дээр тус сүмийн эсрэг гомдол гаргасан байна.

Прокуроруудын мэдээлснээр 2023 оноос хойш тус сүмд хүчээр өргөл барьц, хандив өргөсөн гэх 200 орчим хүн нийт 5.7 тэрбум иен буюу 38.5 сая ам.доллартай тэнцэх хэмжээний нөхөн олговрыг Мүүний сүмээс нэхэмжилж, шаардаж байгаа ажээ.

Токио хотын дүүргийн шүүхээс гаргасан шийдвэр, тушаалын дагуу Мүүнийн сүмийн шашны байгууллагын хувиар эдэлж байсан татвараас чөлөөлөгдөх эрхийг нь цуцалж, хөрөнгийг нь хураахаар болсон байна. Гэхдээ Япон улсад үйл ажиллагаа явуулах эрхийг нь цуцлаагүй байна.

Өмнөд Солонгос улсад анх үүсгэн байгуулагдаж байсан “Эв нэгдлийн сүм” нь 1960-аад оноос Япон улсад үйл ажиллагаа явуулах болсон юм. Үүсгэн байгуулагч Сун Мюн Мүүний нэрээр нь тус шашны байгууллагыг Мүүний хэмээн нэрлэх болсон бөгөөд олон мянган хосын хуримыг нэг дор зохион байгуулдгаараа алдартай тус байгууллага Японы ерөнхий сайд Шинзо Абе-гийн аллагын хэрэгт нэр холбогдоод зогсохгүй эрх баригч консерватив намын олон тооны хууль тогтоогчид Мүүний сүмтэй ямар нэгэн байдлаар холбоотой болох нь мөрдлөгийн явцад тогтоогдож, нэлээд шуугиан дэгдээж байсан билээ.