Израилын ерөнхий сайд Б.Нэтаньяху Хамас бүлэглэлийг буулгаж авахын тулд тус бүлэглэлд үзүүлэх дарамт шахалтаа улам нэмэгдүүлэх амлалтыг өгсөн байна.

Тэрээр ням гарагт явагдсан Израилын засгийн газрын хуралдааны эхэнд дээрх мэдэгдлийг хийсэн бөгөөд үлдсэн барьцааны хүмүүсийг аюулгүй суллахын тулд Хамас бүлэглэлд байж болох хамгийн хүнд шахалтыг үзүүлэх болно гэжээ.

Харин Хамас бүлэглэлийн зүгээс зуучлагч талуудаас хүлээж авсан гал зогсоох тохиролцооны саналыг зөвшөөрөн хүлээж авч байгаа гэдгээ өнгөрсөн амралтын өдрүүдээр албан ёсоор мэдэгдсэн. Хамас бүлэглэлийн удирдагч Халил аль Хаяа бямба гарагт хийсэн мэдэгдэлдээ зуучлагч Египет болон Катар улсуудаас хүлээж авсан гал зогсоох саналыг зөвшөөрч байгаагаа мэдэгдсэн юм.

Зуучлагчдын зүгээс Хамас бүлэглэлд тавьсан саналд барьцааны 5 хүнийг сулласан тохиолдолд гал зогсоох тохиролцоог тодорхой хугацаагаар сунгах тухай асуудал багтсан болохыг Арабын хэвлэлүүд мэдээлжээ.

Тэгвэл Израилын ерөнхий сайд Б.Нэтаньяху ням гарагийн мэдэгдэлдээ байлдааныг бүрмөсөн зогсоож, дайныг өндөрлөсөн тохиолдолд Хамас бүлэглэлийг зэвсэггүйжүүлж, тус бүлэглэлийн удирдагчдыг Газын зурвасын бүс нутгаас бүрмөсөн гаргах ёстой гэдгийг цохон тэмдэглэсэн байна.

Израилын талын дээрх нөхцөл шаардлагыг Хамас бүлэглэл хүлээж авах эсэх нь одоогоор тодорхойгүй байгаа ба Хамас бүлэглэлд зэвсгээ буулгах хүсэл ажиглагдахгүй байгаа юм.

Израилын зүгээс мөн түнш холбоотон болох АНУ-тай хамтран ажиллаж, боловсруулсан гал зогсоох тухай өөр саналыг зуучлагч талуудад хүлээлгэн өгөөд байгаагаа мэдэгдсэн байна.

Израил, Хамасын хооронд өнгөрөгч 1-р сарын 19-ний өдрөөс эхлэн 6 долоо хоногийн хугацаанд үргэлжилсэн гал зогсоох тохиролцоо энэ сарын 1-ний өдөр дуусгавар болсны дараагаар талууд эргээд дайтаж эхэлсэн бөгөөд гал зогсоох тохиролцоог үргэлжлүүлэх явдал гацаанд ороод байгаа билээ.