Украины ерөнхийлөгч В.Зеленский АНУ-ын зүгээс түүнд ашигт малтмал, газрын ховор элементийн шинэ гэрээг санал болгосон талаар мэдэгджээ.

Түүний хэлснээр Вашингтоны зүгээс санал болгосон ашигт малтмалын шинэ гэрээ нь өнгөрөгч сард түүний Д.Трамптай Цагаан ордонд хэрүүл маргаан үүсгэж, улмаар байгуулж чадаагүй өмнөх ашигт малтмалын гэрээнээс тэс ондоо, цоо шинэ гэрээ гэдгийг онцоллоо.

АНУ-ын зүгээс санал болгосон шинэ гэрээнд өмнө нь хэлэлцээгүй олон зүйлсийг багтаан оруулсныг Украины төрийн тэргүүн тодотгосон байна.

Гэсэн хэдий ч Зеленский энэ удаад АНУ-ын саналаас шууд татгалзахгүй, оронд нь АНУ-ын шинэ гэрээний төслийг хуулийн эксперт мэргэжилтнүүдээр судлуулах бодолтой байгаагаа нэмж хэлсэн байна. 

Их Британийн Financial Times сонины зүгээс өнгөрсөн баасан гарагт АНУ-ын шинэ гэрээний хувийг олж авснаа мэдээлж, энэхүү шинэ гэрээ нь “асар их ашиг авчрах Украины байгалийн баялгийг хяналтандаа авах гэсэн Трампын засаг захиргааны хүчин чармайлт эрс нэмэгдэж байгааг харуулж байна” гэжээ.

АНУ-ын ерөнхийлөгч Д.Трамп АНУ-Украины ашигт малтмалын гэрээ удахгүй байгуулагдах болно гэж өнгөрсөн долоо хоногт мэдэгдсэн бол Financial Times сонины мэдээнд АНУ-ын шинэ гэрээний төслийг “шударга бус” гэж Украины албаны хүмүүс тодорхойлж, тус гэрээ байгуулагдахгүй болов уу гэж хэлснийг эш татан мэдээлжээ.