АНУ-ын ерөнхийлөгч Д.Трамп ням гарагт Америкийн NBC News телевизийн нэвтрүүлэгт утсаар холбогдож өгсөн ярилцлагадаа энэ долоо хоногт ОХУ-ын ерөнхийлөгч В.Путинтэй холбогдож ярилцана гэдгээ мэдэгдсэн байна.
Мөн тэрээр ОХУ-ын ерөнхийлөгч В.Путины өнгөрсөн долоо хоногт Украины төрийн тэргүүн В.Зеленскийн улсаа удирдах чадварыг шүүмжилсэн явдалд “галзууртлаа уурласан” гэдгээ ярилцлагын үеэр хэлжээ.
В.Путин Украины ерөнхийлөгч В.Зеленскийг өнгөрсөн 2024 оны 5-р сард бүрэн эрхийн хугацаа нь дууссан, хууль бус ерөнхийлөгч хэмээн тодорхойлж, түүнийг буулгаж, ээлжит сонгууль явагдах хүртэл Украины ерөнхийлөгчийн үүргийг гүйцэтгэгчийг томилох ёстой гэсэн утга бүхий үгийг өнгөрсөн долоо хоногт хэлсэнд АНУ-ын ерөнхийлөгч Д.Трамп ихэд уурласан гэжээ.
Трамп хэлэхдээ, “Хэрвээ Украинд цус ургасан энэхүү дайныг би ОХУ-тай тохиролцож зогсоож чадахгүй бол, хэрвээ би үүнийг Оросын буруу гэж бодвол…би Оросын газрын тосны бүхий л экспортод хоёрдогч тариф ногдуулах болно” хэмээн нэлээд сүрдүүлгийн шинжтэй үг хэлсэн байна.
Өөрөөр хэлбэл Д.Трамп хэрвээ ОХУ-тай Украины дайныг өндөрлүүлэхэд чиглэгдсэн гал зогсоох тохиролцоонд хүрч, улмаар энхийн гэрээ байгуулж чадахгүй бол ОХУ-аас газрын тос импортлогч дэлхийн бүхий л улс орнуудад давхар тариф ногдуулах болно хэмээн сүрдүүллээ.
ОХУ-аас газрын тос худалдаж авдаг улс орнуудын АНУ-д гаргах экспортын бараа бүтээгдэхүүнд дээрх импортын нэмэлт тарифыг АНУ ногдуулах бөгөөд “хэрвээ ОХУ-аас газрын тос худалдаж авбал АНУ-тай худалдаа явуулах боломжгүй болно” хэмээн Трамп хэлсэн байна.
Түүнчлэн Д.Трамп хоёрдогч тарифын хэмжээ 25-50 хувийн хооронд хэлбэлзэх ба нэг сарын дотор ОХУ, Украины хооронд гал зогсоох тохиролцоо хүрэхгүй бол шууд ногдуулах болно гэдгийг тодотгожээ. Гэхдээ Трамп мөн “хэрвээ Путин зөв үйлдэл хийвэл түүний уур түргэн арилах болно” гэсэн байна.
Цагаан Ордны зүгээс өнгөрсөн долоо хоногт Хар тэнгист гал зогсоох тал дээр ОХУ болон Украинтай тохиролцоонд хүрлээ хэмээн зарласан боловч ОХУ-ын зүгээс дээрх тохиролцоог эхлүүлэхийн тулд Оросын эсрэг авч хэрэгжүүлж буй зарим олон улсын хоригийг цуцлах ёстой гэсэн урьдчилсан нөхцөл шаардлагыг тавьсан билээ.