Дэлхийн тэргүүн баячуудын нэг, цахим худалдааны Amazon платформыг үүсгэн байгуулагч, тэрбумтан Жефф Безос болон түүний сүйт бүсгүй Лорен Санчез нар энэ зун Италийн Венец хотод хуримлахаар болжээ.

Тэдний хуримын тов болон зочдын нэрсийн талаарх мэдээлэл хараахан гараагүй байгаа ч хосууд хэдийнээ хуримын урилгаа тараагаад дууссан талаар эх сурвалжууд мэдээлж байна.

Жефф Безос, Лорен Санчез нарын хурим болох Венец хотын дарга Луижи Бруньаро энэ талаар мөн хэвлэлд ярилцлага өгсөн байна. Тэрээр Жефф Безосыг хуримандаа зориулж олон тооны зочид буудал, гондола завь, усны такси захиалсан талаарх мэдээллийг үгүйсгэхийн сацуу Безос, Санчез нарын хурим хотын оршин суугчдын тав тухыг алдагдуулж, асуудал үүсгэхгүй гэдгийг мэдэгджээ.

Тэрээр People сэтгүүлийн өнгөрсөн амралтын өдрийн дугаарт өгсөн ярилцлагадаа “Бид хуримын зохион байгуулагч нартай хамтран ажиллаж, тэдэнд дэмжлэг үзүүлж байгаа, Жефф Безосын хуримын талаар олон худал хуурмаг мэдээллүүд гарч байна, өмнө нь Их Хорь, Их Долоогийн чуулга уулзалтуудыг зохион байгуулж байсан туршлагатай Венец хотод долоо хоног бүр нийтийг хамарсан олон арга хэмжээ зохиогддог тул хуримын үеэр жуулчдын тоо хэт ихсэх аюул эрсдэл гарахгүй” гэсэн байна.

Өдгөө 61 настай Жефф Безос 55 настай телевизийн сэтгүүлч Лорен Санчезт 2023 оны 5-р сард анх гэрлэх санал тавьж, 2.5 сая ам.долларын үнэтэй, 20 каратын ягаан очир эрдэнийн шигтгээ бүхий сүйн бөгж гарт нь зүүж өгч байсан ажээ.

Улмаар тухайн жилийнхээ 8-р сард тэд сүй тавьснаа тэмдэглэж Кору арал дээр томоохон үдэшлэгийг зохион байгуулж, үдэшлэгтээ тэрбумтан Билл Гейтс, түүний найз бүсгүй Паула Херд, телевизийн хөтлөгч Опра Уинфри, жүжигчин Барбара Стрейзанд, Салма Хайек Пино, Роберт Паттинсон, дуучин Суки Уотерхаус, загвар өмсөгч Миранда Керр зэрэг олон алдартнуудыг урьж оролцуулж байсан байна.

Forbes сэтгүүлийн тэрбумтнуудын жагсаалтад бичсэнээр өнөөдрийн байдлаар Жефф Безосын хөрөнгийн хэмжээ 209.2 тэрбум ам.доллараар хэмжигдэж байна.

Түүний сүйт бүсгүй Лорен Санчезаас гэрлэснийхээ дараа Жефф Безосын овгийг авах уу гэсэн асуултанд тэрээр “Тэгэлгүй яахав, 100 хувь. Би хатагтай Безос болохыг тэсэн ядан хүлээж байна” хэмээн хариулжээ.