Францын сөрөг хүчний Үндэсний Хөдөлгөөн намын тэргүүн Марин Ле Пенийг ЕХ-ны төсвийн хөрөнгө санхүүг өөрийн намын үйл ажиллагаанд зориулж шамшигдуулсан хэрэгт буруутгажээ.

Францын шүүхээс хэт барууны үзэлт Үндэсний Хөдөлгөөн намын дарга Марин Ле Пенийг ЕХ-ны сангийн хөрөнгийг өөрийн намын ажилтнуудыг цалинжуулах зорилгоор 2004-2016 оны хооронд шамшигдуулж зарцуулсан хэрэгт буруутай болохыг тогтоож, улмаар түүнийг төр засгийн албанд томилогдох эрхийг нь 5 жилээр хориглох тухай шүүхийн шийдвэрийг даваа гарагт танилцуулсан байна.

Марин Ле Пен болон түүний намын өөр бусад 20 гаруй удирдах албан тушаалтнуудыг Европын парламентаас олгосон цалин хөлсөөр ажиллаж байсан туслах ажилтнуудыг Европын парламентын ажил бус, харин өөрийн Үндэсний Хөдөлгөөн намын ажлыг олон жилийн турш хийлгэж байсан хэрэгт буруутгасан байна.

Ийнхүү түүний буруутайг шүүхээр тогтоож, шийтгэл оноосноор тэрээр ээлжит ерөнхийлөгчийн сонгуульд өрсөлдөх эрхгүй болоод байна. Түүнд шүүхээс ерөнхийлөгчийн сонгуульд өрсөлдөх эрхийг нь 5 жилээр хориглох шийдвэр гаргаад байгаа бол прокуроруудын зүгээс түүнд торгууль ногдуулж, хорих ял оноож, төр засгийн албанд нэр дэвшиж томилогдох эрхийг нь таван жилээр хасах ёстой гэсэн байр суурийг илэрхийлж байсан юм.

Марин Ле Пений энэхүү хэргийн шүүх үйл явц удаан хугацаанд үргэлжилж байгаа бөгөөд өнгөрсөн жил болсон шүүхийн сонсголын үеэр тэрээр “ямар ч буруутай үйлдэл хийгээгүй” хэмээн түүний эсрэг үүсгэсэн хэргийг няцааж байжээ.