Гюдон буюу үхрийн махтай хоолоор дагнасан Японы алдартай “Sukiya” сүлжээ ресторан энэ долоо хоногт өөрийн бүх 2000 салбарынхаа дийлэнхийг хаахаар болсноо мэдэгджээ. Тус сүлжээ рестораны хоолноос харх болон хорхой шавж гарсны улмаас дээрх арга хэмжээг авахаар болсон байна.

Өнгөрсөн долоо хоногийн баасан гарагт “Sukiya” сүлжээ рестораны Токио хотын захад байрлах нэгэн салбарын хоолноос шавж, хорхой гарсантай холбогдуулан ийнхүү тодорхойгүй хугацаагаар бараг бүх салбараа хаахаар болжээ. Дээрх явдлаас өмнө буюу өнгөрсөн 1-р сарын сүүлээр мөн Тоттори хотын салбарын аягатай мисо шөлнөөс харх олдсон юм.

Тус сүлжээ рестораны зүгээс “тав тухгүй байдал үүсгэсэндээ” үйлчлүүлэгчдээсээ уучлалт хүсэж, 3-р сарын 31-нээс 4-р сарын 4-ний хооронд дийлэнх салбарынхаа үйл ажиллагааг зогсоон хааж, ариутгал болон шавжгүйтгэлийн ажлыг гүйцэтгэхээр болсноо зарласан байна.

Түүнчлэн өнгөрсөн долоо хоногийн баасан гарагт захиалсан хоолноос нь хорхой, шавж гарсан үйлчлүүлэгчид нөхөн төлбөр олгож, тухайн салбарыг хааж, үзлэг шалгалт явуулж эхэлсэн болохыг мэдээлжээ.

Sukiya сүлжээ рестораны зүгээс өнгөрсөн оны жилийн эцсийн тайландаа нийт 1957 салбар ажиллуулдгаас олон улсад 675 салбартайг онцолсон байна. Тус сүлжээ рестораны салбарууд Хятад, Тайвань, Тайланд, Бразил зэрэг улсуудад ажилладаг ажээ.

Sukiya сүлжээ рестораныг эзэмшдэг Zensho Holdings компани нь мөн Япон болон олон улсын хэмжээнд Hama-sushi, Coco’s, Lotteria, Jolly Pasta, Big Boy, Café Milano зэрэг өөр бусад олон томоохон брэнд рестораны сүлжээг ажиллуулдаг байна.