Ирландын хувцас загварын Primark компанийн захирал Пол Маршан нэгэн эмэгтэйн түүний эсрэг гаргасан гомдлын улмаас албан тушаалаасаа өөрийн хүсэлтээр буугаад байна.

Нэрийг нь нууцласан нэгэн эмэгтэй нийгмийн сүлжээнд гаргасан Пол Маршаны “зохисгүй авирыг” хууль хүчний байгууллагад мэдэгдэн, гомдол гаргаж, улмаар гомдлыг мөрдөн шалгасан бөгөөд Primark компанийг эзэмшигч ABF буюу Associated British Foods-ийн зүгээс Пол Маршаныг “өөрийн буруутай үйлдлээ ухаарч, нийгмийн хэв хэмжээг давсан зохисгүй зан авир гаргаснаа хүлээж, хэргийн мөрдлөгөд хамтран ажиллаж, тухайн эмэгтэйгээс уучлалт гуйсан” гэдгийг албан ёсоор мэдээлжээ.

Түүнчлэн тус толгой компанийн гүйцэтгэх захирал Жорж Вестон болсон явдалд харамсч байгаагаа илэрхийлээд, “үүрэг хариуцлагаа хүлээх нь манай бизнес урт удаан хугацаанд оршин тогтнох цорын ганц арга зам юм” хэмээн тодотгосон байна.

Дээрх мэдэгдлийн дараагаар ABF-ийн хувьцааны ханш 4 орчим хувиар унажээ.

Пол Маршан нь анх 2009 онд Primark компанийн гүйцэтгэх захирлын албыг тус компанийг үүсгэн байгуулагч Артур Райнаас хүлээн авч байсан юм. Түүний удирдлаган дор Primark компани олон улсын зах зээлд гарч, Европын орнууд болон АНУ-д салбар дэлгүүрүүдээ амжилттай нээж байсан түүхтэй.

Хямд үнэтэй, түргэн загварын хувцсуудаараа алдартай Primark компани нь толгой компани болох ABF-ийн 20 тэрбум еврогоор хэмжигддэг нийт худалдааны орлогын бараг тал хувийг дангаараа бүрдүүлдэг байна.

Пол Маршаныг ажлаа өгсөнтэй холбоотойгоор ABF-ийн санхүүгийн хэлтсийн захирал Эойн Тонге Primark компанийн гүйцэтгэх захирлын албыг түр хугацаанд хашихаар болжээ.