АНУ-ын сенатч Кори Букер Сенатад хамгийн удаан хугацаанд илтгэл тавьж, үг хэлсэн шинэ дээд амжилтыг тогтоогоод байна.

Нью Жерси мужийн улс төрч Кори Букер орон нутгийн цагаар даваа гарагийн орой Сенатын танхимд үг хэлж эхэлсэн бөгөөд мягмар гарагийн үдэш буюу 25 цаг 5 минут илтгэл тавьсныхаа дараагаар сөгдөн унажээ.

Ардчилсан намын гишүүн, сенатч Кори Букерын бүтэн өдрийн турш үргэлжилсэн илтгэлийн гол агуулга нь АНУ-ын ерөнхийлөгч Д.Трампын засаг захиргааны авч хэрэгжүүлж буй арга хэмжээ, бодлого стратегийг эсэргүүцсэн, Америкийн ардчилал аюулд орлоо гэдгийг сануулсан утгатай байлаа. Тэрээр энэхүү түүхэнд бичигдэх үйлдлээрээ Ардчилсан намынхны Трампын эсрэг үзэл бодол, байр суурийг илэрхийлээд байна.

Кори Букер илтгэлийнхээ үеэр “бие минь дийлэхээ болих хүртэл үг хэлэх болно” гэжээ. Кори Букерын илтгэлийн дундуур Ардчилсан намын гишүүд түүнээс асуулт асууж, түүнд амрах боломж олгож байснаас гадна мөн тэрээр Д.Трампын бодлого, үйл ажиллагааг эсэргүүцсэн сонгогчдоос ирүүлсэн захидлыг уншиж танилцуулсан байна.

Өмнө нь америк хөл бөмбөг тоглож байсан, өдгөө 55 настай сенатч Кори Букер Сенатын түүхэнд хамгийн удаан хугацаанд үг хэлж, илтгэл тавьсан хүнээр ийнхүү тодроод байна. Түүний өмнөх амжилтыг Бүгд найрамдах намын гишүүн, сенатч Стром Турмонд 1957 онд тогтоож байсан бөгөөд тухайн үед түүний иргэний эрхийн хуулийн төслийг эсэргүүцсэн илтгэл 24 цаг 18 минут үргэлжилж байжээ.