Цахим орчинд тавьсан “Виз шуурхай гаргана” гэсэн зарын дагуу хүмүүс холбогдож, урьдчилгаа мөнгө шилжүүлэн залилуулсаар байгааг Цагдаагийн ерөнхий газар анхаарууллаа. Өнгөрсөн долоо хоногт ийм 3 гэмт хэрэг бүртгэгджээ.
ЦЕГ-ын Урьдчилан сэргийлэх албаны ахлах мэргэжилтэн, хошууч А.Итгэлт “Өнгөрсөн долоо хоногт виз гаргах зараар холбогдож, залилуулсан 3 иргэний гомдол бүртгэгдсэн байна. Нэг нь “Солонгос улс руу 3 сарын виз яаралтай гаргаж өгнө” гэсэн зарын дагуу холбогдон, урьдчилгаа 5 сая төгрөг шилжүүлж, залилуулсан байгаа юм.

Иргэдийн анхаарах ёстой ганцхан зүйл байна. Таны зорчихыг хүсэж байгаа улсын Элчин сайдын яам албан бичгээр, цаасан дээр гарын үсэг зурж баталгаажуулж байж виз олгодог. Үүнийг л иргэд ойлгох хэрэгтэй байна. Түүнээс биш, аль нэг Элчин сайдын яаманд ажилладаг, Элчин сайдын яаманд танил талтай, тэр улсад амьдардаг хүн виз гаргаж өгөх боломжгүй. Дэлхийн бүх улс орон даяар яг энэ зарчим үйлчилдэг. Тиймээс цахимаар залилан хийж байгаа хүмүүст хууртаж, урьдчилгаа мөнгө шилжүүлэхгүй байхыг хүсье!