АНУ-ын ерөнхийлөгч Д.Трамп лхагва гарагт харилцан тэгш тариф тогтоох тухай томоохон мэдэгдэл хийх гэж байна. Тэрээр даваа гарагт Цагаан ордонд сэтгүүлчдэд хийсэн мэдэгдэлдээ харилцан тэгш тариф тогтоох түүний төлөвлөгөө АНУ-д “үлэмж хэмжээний хөрөнгийг аврах болно” гэжээ.

Дональд Трампын танилцуулах харилцан тэгш тариф тогтоох тухай бодлого, төлөвлөгөө шууд хүчин төгөлдөр үйлчилж эхэлнэ гэдгийг Цагаан ордноос мэдэгдсэн байна.

Д.Трамп нийслэл Вашингтон хотноо зохиогдох “Make America Wealthy Again” буюу “Америкийг ахин хөрөнгөтэй болгоё” хэмээн нэрлэсэн тусгай арга хэмжээний үеэр тэрээр томоохон мэдэгдлээ хийх ба тус арга хэмжээ орон нутгийн цагаар лхагва гарагийн 16:00 цаг буюу Улаанбаатарын цагаар пүрэв гарагийн үүрийн 04:00 цагт болох ажээ.

Дэлхийн улс орнуудтай харилцан тэгш тариф тогтоохдоо ямар улс орнуудыг хамруулах, тарифын хэмжээ хэр байх зэрэг сэтгүүлчдийн асуултанд Д.Трамп ч, Цагаан Ордон ч дэлгэрэнгүй хариулт өгөөгүй бөгөөд Трампын мэдэгдлийн дараагаар энэ бүхэн тодорхой болох юм.

АНУ-ын худалдааны түнш улс орнууд дээрх тарифын бодлогоос чөлөөлөгдөх эсэх тухай асуултанд Д.Трамп “олон зүйлээс шалтгаална” гэж хариулсан нь зарим улс орнууд харилцан тэгш тарифын бодлогоос хасагдаж магадгүйг илтгэжээ.