Мьянмар улсын төв хэсэгт тохиосон 7.7 магнитудын хүчтэй газар хөдлөлтөд амь үрэгдсэн хүний тоо 2700-г даваад байгааг тус улсын цэргийнхний зүгээс мягмар гарагт мэдэгджээ.

Тус мэдэгдэлд амь үрэгдэгсдийн тоо 2719 болсон бол 4521 хүн бэртэж гэмтсэнийг зарласан байна. Мөн түүнчлэн 441 хүн сураггүй алга болоод байгаа тул амь үрэгдэгсдийн тоо нэмэгдэж болзошгүй гэдгийг анхаарууллаа.

Эрж хайх, аврах ажиллагаа үргэлжилсээр байгаа ба мягмар гарагт нийслэл Нейпьидо хотын нэгэн барилгын нурангин доор 90 гаруй цаг байсан 63 настай эмэгтэйг амжилттай аварч, эсэн мэнд гаргаж чадсан байна.

Газар хөдлөлтийн улмаас томоохон газар нутгийн хамарсан гарз хохирол учирч, олон байшин барилгууд нурсантай холбоотойгоор аврах ажиллагаа удаашралтай үргэлжлэн явагдаж байгаа ажээ.

Мьянмарт болсон газар хөдлөлт мөн хөрш зэргэлдээх Тайланд улсад мэдрэгдэж, ихээхэн гарз хохирол учруулаад байна. Тайландын эрх баригчдын мэдээлж байгаагаар нийслэл Бангкок хотод 10 мянга гаруй байшин барилга нурж, хамгийн багадаа 13 хүн амиа алдаж, 70 гаруй хүнтэй холбоо тогтоох боломжгүй буюу сураггүй болжээ.

Тайландын засгийн газраас мөн Бангкок хотноо нурсан өндөр барилгын шалтгааныг олж тогтоох тусгай хороо байгуулснаас гадна гамшгаас урьдчилан сэргийлэх тал дээр өндөр туршлагатай Япон улсад эксперт мэргэжилтнүүд илгээх хүсэлт тавьжээ.