ОХУ-ын ерөнхийлөгч В.Путин 18-30 насны 160 мянган эрэгтэйг цэргийн жинхэнэ албан татах зарлиг гаргасан байна. Энэ удаагийн цэрэг татлага нь 2011 оноос хойшхи хамгийн том цэрэг татлага болох гэж байгааг эх сурвалжууд мэдээллээ.
В.Путин хэдхэн сарын өмнө ОХУ нийт цэргийн тоо хэмжээгээ 2.39 саяд хүргэж, үүнээс идэвхитэй цэргийн албан хаагчдын тоог 1.5 саяд хүргэх ёстой хэмээн мэдэгдэж байсан бол ийнхүү 2025 оны хавар 160 мянган хүнийг цэрэгт татахаар болоод байна.
ОХУ-ын дэд адмирал Владимир Цимлянскийн хэлснээр шинээр цэрэгт татагсдыг Украинд дайтахаар илгээхгүй гэжээ. Цэрэг татлага энэ сараас эхлэн 7-р сар хүртэл явагдах бөгөөд өнгөрсөн 2024 оны цэрэг татлагаас тоо хэмжээний хувьд 10 мянгаар илүү байгаа ажээ.
Түүнчлэн өнгөрсөн жилээс эхлэн цэрэгт татагдах эрэгтэйчүүдийн насны дээд хязгаар 27 байсныг 30 болгож нэмэгдүүлсэн тул энэ удаад 18-30 насны залуус цэрэгт татагдана. Цэргийн жинхэнэ албанд татах тухай цэргийн зарлан дуудах мэдэгдлийг шуудангаар хүргэхээс гадна ОХУ-ын төрийн үйлчилгээний Госуслуги вебсайтаар дамжуулан цахим мэдэгдэл хүргэх юм байна. Зарим эх сурвалжуудын мэдээлснээр 4-р сарын 1-ний мягмар гарагаас нийслэл Москва хотын залууст цэргийн зарлан дуудах мэдэгдлүүд ирээд эхэлсэн гэжээ.
Хэдийгээр АНУ-ын талаас гал зогсоох зуучлалын ажлыг хийж гүйцэтгэсээр байгаа ч ОХУ ийнхүү цэрэг татлагын тоо хэмжээгээ улам нэмэгдүүлсээр байна. Тус улс Украины дайнд 100 мянга гаруй цэргээ алдсан бөгөөд цэргийн гарз хохирлоо нөхөхийн тулд ийнхүү цэрэг татлагын тоо хэмжээг нэмэгдүүлж байгаа талаар барууны эх сурвалжууд мэдээлж байна. Цэрэгт татагдаж, дайнд явж амиа алдахгүйн тулд цэргийн дүйцүүлэх алба хаах Орос иргэдийн тоо нэмэгдсээр байгаа юм.
Зөвхөн Украины дайн гэлтгүй НАТО-гийн цар хэмжээ томорч байгаа тул ОХУ цэргийн тоо хэмжээгээ нэмэгдүүлэх арга хэмжээ авахаас өөр аргагүй гэсэн байр суурийг 2023 оны сүүлээр илэрхийлж байсан юм. Украины дайн эхэлснээс хойш НАТО-д Швед, Финланд улсууд нэгдэж бүл нэмсэн. ОХУ-тай 1343 км урт хиллэдэг, НАТО-гийн гишүүн Финланд улсын ерөнхий сайд Петтери Орпо газрын мина-г хориглох олон улсын гэрээ конвенцоос Финланд улс гарч байгааг мягмар гарагт мэдэгдсэн байна. Польш болон Балтийн орнууд хоёр долоо хоногийн өмнө мөн дээрхтэй ижил шийдвэр гаргаснаа зарласан бөгөөд шалтгааныг нь Оросын аюул заналхийллийн эсрэг хэмээн тайлбарласан билээ.