Холливудын нэрт жүжигчин Вал Килмер 65 насандаа таалал төгсжээ. Түүнийг мягмар гарагт уушгины хатгалгаа өвчний улмаас нас барсан болохыг жүжигчний охин Мерседес Килмер New York Times сонинд мэдээлсэн байна.

АНУ-ын Лос Анжелес хотод төрж өссөн Вал Килмер ахлах сургуульд байхдаа уран бүтээлийн гараагаа эхлүүлж байсан бөгөөд жүжигчний мэргэжлээр Холливудын мэргэжлийн сургууль болон Нью-Йорк хотын алдарт Жуллиардын их сургуульд суралцаж байжээ.

1984 онд “Top Secret” хэмээх кинонд тоглосон нь түүний хувьд анхны бүрэн хэмжээний уран сайхны киноны дүр байсан бол ердөө хоёрхон жилийн дараа алдарт жүжигчин Том Круизын хамт “Top Gun” кинонд тоглож, алдаршиж байсан юм.

Вал Килмер найруулагч Оливер Стоуны 1991 оны “The Doors” кинонд бүтээсэн Doors хамтлагийн ахлагч, дуучин Жим Моррисоны дүрээрээ алдартай. Мөн тэрээр 1995 оны “Batman Forever” кинонд Бэтмены дүрд тоглож байсан билээ.

Жүжигчин Вал Килмер уран бүтээлийн замналынхаа туршид нийт 81 уран сайхны кинонд гол болон туслах дүрийг бүтээснээс гадна телевизийн болон тайзны олон бүтээлүүдэд тоглож байсан ажээ. Мөн тэрээр “I’m Your Huckleberry: A Memoir” хэмээх намтар номоо 2020 онд гаргаж байжээ.

Вал Килмер 2014 онд улаан хоолойн хорт хавдартай болох нь тогтоогдож, энэ талаараа 2017 онд олон нийтэд мэдэгдэл хийж байсан бөгөөд түүний охин эцгийгээ хорт хавдраас бүрэн эдгэрээд байсан талаар New York Times сонинд ярьжээ.

Жүжигчин Вал Килмер “Willow” киноны зураг авалтын үеэр танилцсан жүжигчин Жоанн Валлейтэй гэрлэж, хүү охин хоёртой болж байсан ч хосууд хамтдаа 1988-1996 оны хооронд амьдарсан байдаг байна.