Өмнөд Солонгосын ерөнхийлөгч Юн Сок Ёлыг цэргийн онц байдал зарласантай холбоотойгоор импичментээр огцруулах эсэх Үндсэн хуулийн шүүхийн шийдвэр баасан гарагт гарахаар болсон байна.

Тус улсын хэвлэл мэдээллийн хэрэгслүүдийн мэдээлснээр Үндсэн хуулийн шүүх шийдвэрээ орон нутгийн цагаар баасан гарагийн 11:00 цагт явагдах шүүх хурлын төгсгөлд танилцуулах бөгөөд шүүхийн шийдвэрийг телевизээр шууд дамжуулахын сацуу иргэд, олон нийтийн төлөөллийг байлцуулахаар болжээ.

8 гишүүнтэй БНСУ-ын Үндсэн хуулийн цэцийн 6 гишүүн дэмжсэн тохиолдолд Юн Сок Ёлыг ерөнхийлөгчийн албан тушаалаас нэн даруй огцруулж, хуулийн дагуу 60 хоногийн дотор ерөнхийлөгчийн сонгуулийг явуулах бол импичментээр огцруулахыг дэмжээгүй тохиолдолд тэрээр ерөнхийлөгчийн албан тушаалаа нэн даруй сэргээн үргэлжлүүлж, 2027 оны 5-р сар хүртэл төрийн тэргүүний албан тушаалаа хаших болно.

Ийнхүү 2024 оны 12-р сарын 3-ны өдөр богино хугацаанд үргэлжилсэн цэргийн онц байдлыг зарласнаас хойш 4 орчим сарын дараагаар Өмнөд Солонгос улсын Үндсэн хуулийн шүүх шийдвэрээ гаргахаар болж байна.

Өмнөд Солонгосын Ёнхап агентлагийн мэдээлснээр, Юн Сок Ёлын импичментийн шүүх хурлын шийдвэр гарах өдөр үндэсний хэмжээнд 20 мянган цэрэг, цагдааг хамруулсан хүчинг бэлэн байдалд оруулж, дотоодын аюулгүй байдлыг хангаж ажиллана. Үүнээс 14 мянган цагдааг нийслэл  Сөүл хотын төвийн хэсэгт байрлуулахаар болжээ.

Түүнчлэн БНСУ-ын ерөнхийлөгчийн үүрэг гүйцэтгэгч Хан Доксу лхагва гарагт яамдын сайд нар болон нийслэл Сөүл хотын дарга, цагдаа, онцгой байдал, гал сөнөөх албаныхантай уулзалт хийж, Үндсэн хуулийн шүүхийн шийдвэрийг танилцуулах үеэр ямар ч шийдвэр гарсан дотоодын эв нэгдлээ хадгалж, цэцийн шийдвэрийг уужуу тайван, ухаалгаар хүлээн авч, эсэргүүцлийн жагсаал цуглаанаа тайван замаар явуулахыг ард иргэддээ уриалаад байна. Харин эд хөрөнгө эвдэж сүйтгэх, бусдын биед халдаж, гал тавих зэрэг хууль зөрчсөн үйлдэл гаргасан тохиолдолд газар дээр нь баривчилж, ямар ч өршөөлгүйгээр хэргийг шийдвэрлэх болно гэжээ.