Засгийн газар хэмнэлтийн бодлого хэрэгжүүлэх нэрээр боловсролын салбараас цомхтгол эхэлнэ гэдгээ зарлаад байгаа. Ажил үүргийн давхардал үүсэж байгаа нэрээр 30 гаруй албан тушаалтан цомхтгохоор болсны хажуугаар даргын 400 шинэ албан тушаалд томилгоо хийж байгаа тухай мэдээлэл шуугиан тариад байна. 1 гараараа төрийн 30 жирийн албан хаагчийг ажилгүй болгосныхоо хариуд түүнээс 10 дахин олон даргын суудлыг “бялуу хуваах” зарчмаар 3 намын хамтарсан Засгийн газар томиллоо. Тодруулбал: Засгийн газраас төрийн өмчит хувьцаат компаниуд болон ТӨҮГ-уудад хяналт хариуцсан менежер, бүтээмж хариуцсан менежер гэх албан тушаал бий болгожээ. Бүтээмжийн менежерээр 40 орчим хүнийг өндөр цалинтай ажилд тодорхой хугацаагүйгээр илгээлээ. Харин хяналтын менежерээр хэчнээн хүн томилж байгаа тухай нарийн тоо одоогоор мэдэгдээгүй байна. Хяналт хэрэгжүүлэх газраас эхлээд, сайд болгоны шууд удирдлагад ажиллах хороо, зөвлөлийн тоо хэдэн арваар тоологдож эхэлсэн болохоор шинээр үүсгэж байгаа албан тушаалын тоо 400-гаар тогтох уу, үгүй юү гэдэг эргэлзээтэй асуулт болон үлдлээ.
Төр нь өөрөө цомхон бүтэцтэй ажиллана гэсэн “амлалтаасаа” ухарч, Хэмнэлтийн тухай хуулиа зөрчиж буй энэ үйлдлийг гишүүд төдийгүй олон нийт шүүмжилж эхлээд байна.
Эргээд харахад төрийг цомхон бүтцээр, мэрит зарчмаар удирдана гэж амлаж гарч ирсэн 3 намын хамтарсан Засгийн газар түүхэн дэх хамгийн олон сайдтай Засгийн газар болж данхайсныг бид мартах учиргүй. 22 сайдтай Засгийн газраа цомхон байлгах нэрээр дэд сайд нарын томилгоог хийгээгүй. Гэвч төрийн жинхэнэ гууль жил хүрэхгүй хугацаанд цухуйж, цоо шинэ албан тушаалын савлагаа өрнүүлж эхлэв. Дэд сайд нараас хамаагүй олон тооны менежер нэртэй албан тушаалыг төрийн өмчийн компаниуд болоод төрийн өмчийн үйлдвэрийн газрууд руу илгээж байна. Засагт багтсан МАН, АН, ХҮН намуудаас албан тушаал горилсон гишүүд олон байгаа нь гарцаагүй. Тэднийхээ үүсгэсэн шахалтыг бүтээмжийн менежер, хяналтын менежер нэрээр төрийн өмч рүү шингээхээс өөр сонголт магадгүй Засгийн газарт байгаагүй байж болох. Тэргүүн шадар сайд, АН-ын дарга Л.Гантөмөр ч намын нөхдөдөө “бялуу хувааж” байгаагаа үгүйсгэсэнгүй. “АН-д чадалтай хүний нөөц олон бий” гэж тайлбарлаад зогсож байна. МАН-аас УИХ-ын гишүүн асан М.Оюунчимэгийг “Монголросцветмет” ТӨҮГ-т бүтээмжийн менежерээр томилж байгаа бол ХҮН-аас нийслэлийн агаарын бохирдлыг бууруулах бүтээмжийн менежерээр Э.Золзаяаг томилсон сураг гараад буй.
Түүнчлэн АН-аас НИТХ-д хоёр дахь удаагаа сонгогдон ажиллаж байгаа Д.Бадарсан, НИТХ-ын төлөөлөгч, нийслэлийн засаг даргын орлогчоор ажиллаж байсан Л.Хосбаяр нарыг тус тус нийслэлд бүтээмжийн менежерээр ажиллах тушааал гарчээ. Мөн “Эрдэнэс Тавантолгой”-д МАН бүтээмжийн менежер томилох бол “Эрдэнэт үйлдвэр” ТӨҮГ-т АН хүнээ илгээнэ гэсэн сураг гараад байгаа юм. Засгийн газрын хэрэг эрхлэх газрын дарга Н.Учралын тайлбарлаж байгаагаар хяналтын менежер хяналтаа хэрэгжүүлж, эрсдэлээ удирдана. Бүтээмжийн менежер нь бүтээмжийг ахиулах гол үүрэг хүлээнэ. Засгийн газрын даалгавраар тусгай үүрэг хүлээж очиж байгаа тэднийг хугацаагүй томилсон. Үр дүнгүй ажиллавал эргүүлэн татна гэж мэдэгдлээ.
Уг нь бол төрийн өмчийг үр ашигтай ажиллуулах нь компанийн удирдлагын хариуцах ёстой үүрэг. Гэвч Засгийн газар төрийн өмчийн байгууллагуудын дарга нарыг шалтгаангүйгээр 1 дор солих боломжгүй учраас шинэ албан тушаал зохиохоос өөр сонголт байгаагүй бололтой.
Хуульд байхгүй албан тушаал үүсгэсэн анхны гараа БЭТ томилохоос эхтэй. Хэдэн Засгийн газар дамнуулж ажилласан БЭТ-ийн томилгоонд монголчууд дасаад ирэх цагаар бүтээмж, хяналтын менежерийн шинэ сэтэр бий болголоо. Татвар төлөгчдийн мөнгөөр “хоолонд орохоор” ээлжээ хүлээн орж ирсэн МАН, АН, ХҮН-ын гишүүддээ бялуу хуваах явдлыг бид ахиад хүлцэх үү?
Засгийн газар хуульд байхгүй өндөр цалинтай менежерүүдийг томилж байгаа нь хууль зөрчсөн томилгоо гэдгийг хуульч гишүүд анхааруулж, Ерөнхий сайдад асуулга тавиад байна. Асуулгын хариуг Засгийн газрын тэргүүн 14 хоногт багтаан өгөх учиртай.
Хэрэв дээр дурдагдсан энэ олон тооны албан тушаалаа бүгдийг нь томилчихвол хуульд байхгүй олон тооны албан тушаалын томилгоо үүсгэсэн тоогоороо Л.Оюун-Эрдэнийн Засгийн газар Монголын түүхэнд тодоор үлдэх нь тодорхой боллоо.