Бүтэн 7 сар гаруй үргэлжилж буй Монголын сагсан бөмбөгийн холбооны 2024-2025 оны Үндэсний дээд лигийн плэй-оффын тоглолтууд ширүүн, өрсөлдөөнтэй, онцлогтой өрнөж байна.
Багуудын цувралын харьцаа
“Хасын хүлгүүд” 3:2 “Cэлэнгэ бодонс”
“Бишрэлт металл” 0:3 “SG Apes”
Өнгөрсөн жилийн ялагдлаа ялалт болгох уу, “SG Apes”?
“SG Apes” баг өнгөрсөн улиралд “Бишрэлт металл” багт хожигдсон. Энэ улиралд эдгээр баг хоорондоо дахин тоглохоор таарснаар өмнөх хожигдлынхоо хариуг “Бишрэлт металл”-д барих боломжийг “SG Apes”-т олгож байж магадгүй юм.
Өчигдөр “Бишрэлт металл” болон “SG Apes” багийн цувралын гурав дахь тоглолт боллоо. Энэ тоглолт металлуудын хувьд маш чухал байв. Тэд дараалан хоёр тоглолтод хожигдсон учраас өчигдөр заавал хожих хүндхэн даалгавартай байлаа. Тиймээс сэтгэл нь нэлээн түгшүүртэй байсан нь гарцаагүй.
Хоёр багийн тоглолт эхний тоглолтоос л ширүүн эхэллээ. Эхний хагас хүртэл онооны зөрүү нэг их холдоогүй 30:30 дээр тэнцэж, үеийн төгсгөлд 41:42 харьцаагаар “SG Apes” баг тэргүүлэв.
Харин тоглолтын гуравдугаар үед тус баг онооны тэргүүллээ хоёр оронтой тоо руу оруулж, тоглолтын хэмнэлийг бүрэн удирдсан гэхэд болно. Энэ үеийн төгсгөлд металлууд эсрэг багаасаа 17 оноогоор хожигдож байсан.
Ингээд шийдвэрлэх эцсийн үед ээлж дараалан амжилттай довтолж, онооны зөрүүг ойртуулсан ч эцсийн мөчид 3 оноогоор хожигдлоо. Энэ бол үнэхээр гал гарсан тоглолт байв.
2023-2024 оны улирлын MVP М.Өлзий-Орших эргэн иржээ
Улирал эхэлснээс хойш сагсан бөмбөг сонирхогчдоос олон удаа шүүмжлэл хүртсэн М.Өлзий-Орших плэй-оффын шатанд өөрийгөө хэн гэдгээ харуулж байна. Тэрээр улирлын тоглолтуудад биеэ нөөж байжээ. Одоо л өөрийгөө бүрэн харуулж, багаа манлайлан ердөө нэг хожил авбал аваргын төлөө шалгарч үлдэхэд ойрхон байна.
Үнэ цэнтэй тоглогчийн шагнал авсан түүнийг “Тоглож чадахаа больжээ” гэж үзэгчид хатуу шүүмжилж байсан ч тэр эцэст нь тэр шүүмжлэлийг хүлээн авч, алдаагаа засаж байна. Өчигдрийн тоглолтод нийт 24 оноо авч багаа тэргүүллээ. Багийн ахлагчийн үүргээ ч тултал биелүүлж байна. Одоо түүнд ганц хожил хэрэгтэй.
“Бишрэлт металл” багт амрах зай хэрэгтэй байна уу?
Металлынхны улирал амаргүй байна. Өчигдрийн тоглолтод багийн гол тоглогч А.Энхбаясгалан оролцоогүй. Учир нь тэрээр ахлах шүүгчийн эсрэг зохисгүй үйлдэл гаргасан хэмээн нэг тоглолтоор торгуулсан.
Мөн багийн ахлагч Т.Ууганбаяр хамрандаа бэртэл авсны улмаас хаалт зүүж, хоёр тоглолтод орсон. Хэдийгээр хүнд бэртлийн дараа талбай дээр гарч байгаа ч түүнд амаргүй байгаа бололтой. Эсрэг багийн эсрэг хүчээ шавхсан ч баг нь хожигдов.
Мөн металлууд маш шахуу хуваарьтайгаар Үндэсний дээд лигээ үргэлжлүүлж байна. Тэд сагсан бөмбөгийн Зүүн Азийн орнуудын клубүүдийн лигийн тэмцээн болох “Basketball champions league Asia”-д эх орноо төлөөлөн оролцож, эхний ялалтаа аваад буй. Өчигдөр хүндхэн тоглосон металлынхан өнөөдөр өдөр гэхэд Индонезыг зорино. Ингээд 4 дүгээр сарын 5-нд “Пелита Жаяа” багтай тоглоод, эх орондоо 24 цагийн дараа ирмэгц, шууд цувралын 4 дэх тоглолтоо хийнэ. Ерөнхийдөө дараалсан хүнд тоглолтод “Бишрэлт металл” оролцож байгаа.
Тэр хэрээр тамирчдын сэтгэл санаа, бие бялдар асар их ачаалал авч байгаа нь гарцаагүй. Ямартай ч тэд цувралын 4 дэх тоглолтод хожигдох эрхгүй. Цувралыг эргүүлж өөрчлөх үү, энэ удаагийн улирлаа дуусгах уу?
ДеМаркус Казинсын Монголд дахь аялал үргэлжлэх үү, өндөрлөх үү?
НБА болон Дэлхийд алдартай Казинсаар хүч сэлбэсэн “Сэлэнгэ бодонс”-ууд цувралын 5 дахь тоглолтод хожсоноор “Хүлгүүд”-тэй дахин нүүр тулахаар боллоо. “Гараа сайн бол бариа сайн” гэдэгчлэн “Бодонс” тоглолтын эхнээс өөрсдийн хэмнэлээ удирдаж, онооны тэргүүллээр багтаа давуу тал үүсгэж, маш чухал хожтл авч чадлаа.
Өнгөрөгч хоёр тоглолтод тэд 4 үеийн турш жигд байсан ч төгсгөлөө сайн хийж чадаагүй. Харин 5 дахь тоглолтод заавал хожих даалгавартай гарч ирсэн тэд эхнээсээ тоглолтыг гартаа авч, 40 минутын турш “Хүлгүүд”-д илүү оноо алдаагүй. Тиймдээ ч сэтгэл санаагаар илүү байсан нь харагдав.
Бүтэн улирлын турш тоглох гэрээтэйгээр Монголд ирсэн ДеМаркус Казинс ч ээлжит тоглолт бүртээ өөрийгөө харуулж байна. Талбай дээр гаргаж буй түүний араншин, ур чадварыг монголчууд бүгд харж байна. Үүнээс гадна хаа нэг хошин зангаараа үзэгчдийг хөгжөөж чадаж байгаа билээ. Ямар ч байсан Казинсын аялал дууссангүй. Энэ жишгээр тогловол “Сэлэнгэ бодонс”-ыг плэй-оффын дараагийн шатанд харж чадахаар байна.
Дасгалжуулагчийн зөв шийдвэр “Ахмад Гилберт”
Казинс Монголд ирэх болсноор Ахмад болон Силла нарын нэгийг нутаг буцаах хүндхэн сонголтыг “Сэлэнгэ бодонс” хийсэн. Сонголтын шийдвэр Ахмад Гилберт байв. Плэй-оффын тоглолт эхэлснээс хойш түүний тоглолт жигд бус байв. Хөгжөөн дэмжигчид нь “Силлаг авч үлдэх байж” гэж халагласаар Ахмадын орон гаран тоглолтод дургүй байсан.
Гэсэн ч тэрээр цувралын 5 дахь тоглолтод яах гэж багтаа үлдсэнээ бат харууллаа. Бодонгууд нийт 101 оноо авсны 40 нь Ахмадынх юм. Тэрээр 40 онооныхоо 24-ийг нь холын зайнаас шидэж авчээ. Мөн торгуулийн шидэлтээ 100% гүйцэтгэж, энэ тоглолтод үнэхээр гангарлаа. Өөртөө итгэлтэй, зоримог байсан нь ч түүний харцнаас харагдаж байв. Силла биш Ахмадыг үлдээсэн дасгалжуулагчийн шийдвэр ч нүдээ олжээ.
Цувралын 6 дахь тоглолтод хэрхэх вэ?
“Сэлэнгэ бодонс” ийн хожсоноор цувралын харьцаа 3:2 болж, зургаа дахь тоглолт гарахаар болов. “Бодонс” хожсон ч санаа амрах болоогүй. Дараалан хожиж байж плэй-оффын шатанд үлдэнэ.
Тэгвэл хожигдол хүлээсэн “Хасын хүлгүүд” дараагийн тоглолтод өөр байх нь ойлгомжтой. Тус багийн сэлгээний тоглогчид л гэхэд “Бодонс”-ын гарааны тавын эсрэг маш сайн тоглодог. Дээрээс нь багийн тулгуур Б.Билгүүн, О.Сэргэлэн нарын тамирчин ч үүргээ хангалттай биелүүлж буй.
Цувралын 5 дахь тоглолтын дөрөвдүгээр үеийн төгсгөлд Гавьяат тамирчин Б.Билгүүн гурван удаа дараалан, алсын зайн шидэлтээ амжилттай оруулснаар онооны зөрүүг нэг оронтой тоо руу оруулж ирсэн. Иймдээ ч “Хүлэгүүд” тоглолтын хэмнэлийг маш хурдан сэргээж, өөрсдийн талд авчирдаг. Тиймээс дараагийн тоглолтод тэд өнгөрсөн шигээ орж ирэхгүй болов уу?
Тэдний эсрэг бат зогсохын тулд Бодонс гараагаа сайн эхлүүлж, хэмнэлээрээ төгсгөл хүртэл явах хэрэгтэй. Хоёр багийн цуврал 6 дахь тоглолтоор шийдэгдэх үү? 7 дахь тоглолт гарах уу? Асуултын хариулт маргааш тодорно.