Гуалиг бие хаатай зөөгч бүсгүйчүүдээрээ алдартай Hooters сүлжээ рестораны бизнесийг эзэмшигч  Hooters of America компани дампуурлаа зарлаж байгаагаа мэдэгджээ.  

Тус компани өнөөдрийн байдлаар өөрийн эзэмшлийн 151 салбар ресторан, франчайз эрхтэй өөр бусад 154 ресторанаар үйл ажиллагаа явуулж байгаа бөгөөд дийлэнх салбарууд нь АНУ-д үйл ажиллагаа явуулдаг байна.

Дампуурлын асуудлыг шийдвэрлэх буюу компанийн эзэмшлийн бүх ресторануудаа худалдаж, өр зээлээ дарж дуусгах хугацаанд Hooters-ийн бүх салбар ресторанууд үйл ажиллагаагаа хэвийн үргэлжлүүлэх болно гэдгийг компанийн мэдэгдэлд дурьджээ. Тодруулбал, Флорида болон Иллинойс мужуудад олон тооны франчайз салбаруудыг эзэмшдэг групп компанид Hooters-ийн эзэмшлийн бүх ресторануудаа худалдахаар төлөвлөснөө мэдээлсэн байна.

Hooters-ийн зүгээс ресторануудаа худалдаалах нийт үнийн дүнг зарлаагүй ч дампуурлаас гарах тус арга хэмжээг ойрын 4 сарын хугацаанд явуулж дуусгана гэж мэдэгджээ.

Америкийн ихэнх сүлжээ хоолны газруудын нэгэн адил цалингийн хэмжээ болон үнийн өсөлтөөс гадна үйлчлүүлэгчид ч санхүүгээ хэмнэж, зарлага бага гаргадаг болсноос шалтгаалан Hooters-ийн нөхцөл байдал ч мөн сүүлийн жилүүдэд хүндэрсэн байна.

Компанийн гүйцэтгэх захирал Сал Мелилли мэдэгдэлдээ “Бид Hooters-ийн санхүүгийн бүтцийг шинэчлэл хийх үүднээс дампуурал зарлаж буйгаа мэдэгдэж байгаа ба Hooters сүлжээ ресторан цоо шинээр үйл ажиллагаагаа үргэлжлүүлэх болно” гэжээ.

Hooters компани 1983 онд байгуулагдаж байсан бөгөөд Америк маягийн шарсан тахиа, гуалиг бие хаатай, залуухан зөөгч бүсгүйчүүдээрээ алдартай, түүгээрээ ч үйлчлүүлэгчдээ татаж чадсан түүхтэй.