Нийтийн албан тушаалтнууд өөрийн болон гэр бүлийн гишүүдийн орлого, хөрөнгийг худал мэдүүлэх, санаатайгаар орхигдуулах, хуульд заасан үндэслэлийн дагуу мэдүүлгээ гаргаж бүртгүүлээгүй зэрэг авлигын эсрэг хууль тогтоомжоор хүлээсэн үүрэгтээ хайнга хандах зөрчил их гарч байгааг Авлигатай тэмцэх газар мэдээллээ. Авлигын эсрэг хуулийн 0.3 дахь хэсэгт зааснаар албан тушаалтан хөрөнгө, орлогын мэдүүлгээ жил бүрийн 2 дугаар сарын 15-ны дотор шинэчлэн гаргах ёстой. Албан тушаалд томилогдсон эсвэл сонгогдсон бол тухайн өдрөөс хойш 30 хоногийн дотор мэдүүлнэ. Хөрөнгө, орлогод нь их хэмжээний өөрчлөлт орсон буюу нэг сарын хөдөлмөрийн хөлсний доод хэмжээг 250 дахин нэмсэнтэй тэнцэх, түүнээс дээш хэмжээгээр өөрчлөлт орсон бол 30 хоногийн дотор мэдүүлгээ гаргах үүрэгтэй.

2025.04.01-нээс эхлэн хөдөлмөрийн хөлсний доод хэмжээ 792.000 төгрөг боллоо. Үүнтэй холбоотойгоор нийтийн албан тушаалтан өөрийн болон гэр бүлийн гишүүдийн орлого, хөрөнгөд 198 сая төгрөг буюу түүнээс дээш хэмжээний өөрчлөлт орвол тухайн орлого, хөрөнгөө 30 хоногийн дотор цахим системээр мэдүүлж, АТГ-т бүртгүүлэх ёстой болж байна. 

Нийтийн албан тушаалтны мэдүүлсэн хөрөнгө нь хууль ёсны  орлогоор бий болсон эсэх, эх үүсвэр нь үндэслэлтэй эсэхийг  Авлигатай тэмцэх газар нарийвчлан шалгадаг. Хуульд заасан үүргээ хэрэгжүүлээгүй, мэдүүлгээ хуулийн хугацаанд гаргаж өгөөгүй бол нийтийн албан тушаалаас чөлөөлөх, ажлаас халах хүртэлх хариуцлага хүлээх үндэслэл болно.