Украины ерөнхийлөгч В.Зеленский 4-р сарын 4-ний баасан гарагт Украинд цэрэг байршуулах асуудлаар Европын удирдагчидтай яриа хэлэлцээ явуулахаар болсноо мэдэгджээ.

Украины нийслэл хотноо явагдах хэлэлцээнд Франц, Их Британи болон Европын бусад улс орны төлөөлөгчид хүрэлцэн ирж, оролцохоор болсон байна.

Гал зогсоох тохиролцооны үеэр аюулгүй байдлыг хангах үүднээс Европын энхийг сахиулах хүчинг Украины нутаг дэвсгэрт илгээн, байршуулах санаачилгыг анхлан гаргасан Франц, Их Британи улсуудын зүгээс мөн энэхүү асуудлаар төлөөлөгчдийн багаа Киевт илгээж байгаагаа давхар мэдэгджээ.

Уулзалтанд Европын орнуудын батлан хамгаалах салбар, зэвсэгт хүчний удирдлагууд ирж оролцож, гал зогсоох тохиролцооны үеэр энхийг сахиулж, аливаа зөрчлийг хянан, аюулгүй байдлыг хангаж ажиллах асуудлыг хэлэлцэх бөгөөд энэхүү санаачилга нь Украин улсын аюулгүй байдлын шинэ бүтэц, стратегийн нэг хэсэг болох болно гэдгийг В.Зеленский мэдэгдэлдээ онцолжээ.

Баасан гарагийн уулзалт, яриа хэлэлцээ нь дээрх сэдвийн хүрээнд явагдах анхны олон улсын арга хэмжээ болох гэж байгаа ба Украины төрийн тэргүүн ч мөн маш чухал яриа хэлэлцээ болно гэдгийг онцолж, Европын улс орнууд Украинд цэрэг илгээн байршуулахад бэлэн байгаагаа илэрхийлснийг тодотгосон байна.

Мөн тэрээр уулзалтын үеэр Украины талаас боловсруулсан санал санаачилгыг талуудад танилцуулахын сацуу Украинд байршуулах гадны цэргийн тоо хэмжээ болон ямар байршилд байрлуулах тухай ярилцахыг хүсэж байгаагаа илэрхийлжээ.

Гэвч ОХУ-ын зүгээс Украинд гадны цэрэг байршуулах явдлыг эрс эсэргүүцэж байгаа юм. Хоёр талын хооронд зуучилж, гал зогсоох яриа хэлэлцээг АНУ-ын ерөнхийлөгч Д.Трампын засаг захиргаа үргэлжлүүлэн явуулсаар байна. Украины ерөнхийлөгч В.Зеленский иж бүрэн гал зогсоох тохиролцоонд хүрэхийг эрэлхийлж байгаагаас гадна АНУ болон Европын зүгээс аюулгүй байдлын баталгаа шаардсаар байгаа билээ.

Талууд өнгөрөгч сарын сүүлээр Хар тэнгисийн бүсэд болон эрчим хүчний дэд бүтцүүдэд гал зогсоох тохиролцоонд хүрсэн ч 4-р сарын 1-ний өдөр Оросын тал Украины Харьков хотод томоохон хэмжээний дроны цохилт өгч, иргэний дэд бүтцүүдэд хохирол учруулсан талаар Украины зүгээс мэдэгджээ.