ОХУ-ын хараат бус “Левада-Центр” судалгааны байгууллагын зүгээс сүүлд явуулсан судалгааны дүнгээр судалгаанд оролцогчдын 50% нь Украинд гал зогсоохыг дэмжсэн бол 41% нь эсэргүүцжээ.

Левада-Центр байгууллагын зүгээс өнгөрөгч 3-р сарын 22-26 хооронд нийт 1600 гаруй иргэдийн дунд явуулсан шинэ судалгааны дүнгээ мягмар гарагт танилцуулсан байна.

Тус судалгааг явуулахдаа судалгаанд оролцогч хүн нэг бүртэй нүүр тулсан ярилцлага хийсэн гэнэ.

Судалгаанд оролцогсдын 50 хувь нь 30 хоногийн хугацаанд гал зогсоохыг дэмжсэн бөгөөд яагаад дэмжиж байгаа вэ гэсэн асуултанд 29 хувь нь энэ дайныг үтэр түргэн дуусгахыг хүсэж байгаа гэж хариулсан бол гал зогсоох тохиролцоог дэмжихгүй гэж хариулсан 660 орчим хүний 37 хувь нь гал зогсоосноор Украинд дахин зэвсэглэх хугацаа өгөхөөс өөр үр дүнгүй гэж хариулжээ.

Оросын Левада-Центр судалгааны байгууллагыг ОХУ-ын ерөнхийлөгч В.Путины засаг захиргааны зүгээс “гадны туршуул” хэмээн тодорхойлсон байдаг юм.

Гэсэн хэдий ч тус байгууллага эрх баригчдын дарамт шахалтан дор өөрсдийн хараат бус, биеэ даасан үйл ажиллагаа, судалгаа шинжилгээний ажлуудаа үргэлжлүүлэн явуулсаар байгаа ажээ.