Их Британийн алдарт дөрвөл болох домогт Beatles хамтлагийн гишүүн тус бүрийн намтар түүхийг өгүүлсэн томоохон хэмжээний 4 кино уран бүтээл 2028 онд нэг дор гарахаар болсныг энэ долоо хоногийн эхээр АНУ-ын Лас Вегас хотноо зохиогдож буй CinemaCon үзэсгэлэн яармагийн арга хэмжээний үеэр Sony Pictures кино компанийн зүгээс албан ёсоор зарлан мэдэгджээ.
Бүрэн хэмжээний дөрвөн уран сайхны кино бүхий энэхүү нүсэр том уран бүтээлийг Их Британийн найруулагч Сэм Мендес найруулахаар болсон байна. Түүний хувьд Жеймс Бонд цувралын “Skyfall”, ”Spectre” гэсэн хоёр ангийг найруулснаас гадна 1999 оны “Америк гоо үзэсгэлэн”, 2019 онд дэлгэцнээ гарч байсан Дэлхийн нэгдүгээр дайны талаар өгүүлдэг “1917” гэх зэрэг чанартай, томоохон уран бүтээлүүдийг найруулж, түүний бүтээсэн уран бүтээлүүд нийт 12 Оскарын шагнал хүртэж байсан юм.
CinemaCon арга хэмжээний үеэр мөн Beatles хамтлагийн гишүүдэд тоглох жүжигчдийг танилцуулсан байна. Тодруулбал, хамтлагийн гишүүн Пол Маккартнид “Гладиатор 2” киноны гол дүрд тоглосон Ирландын жүжигчин Пол Мескал, Жон Ленноны дүрд 2024 оны сүүлээр гарсан “Baby Girl” киногоороо шуугиан тариад байгаа Английн жүжигчин Харрис Диккинсон, Ринго Старрын дүрд “Dunkirk”, “Batman”, “Saltburn” зэрэг олон киноны дүрээрээ алдартай Ирландын жүжигчин Барри Кеоган, Жорж Харрисоны дүрд “Stranger Things” телевизийн цувралын дүрээрээ олон танигдсан, удахгүй гарах Marvel-ын “The Fantastic Four: First Steps” киноны гол дүрд тоглоод байгаа Английн жүжигчин Жозеф Куинн гэсэн энэ цаг үеийн залуухан од жүжигчдийг сонгон тоглуулахаар болжээ.
Дээрх залуу жүжигчид мөн CinemaCon-ы тайзан дээр гарч ирж, Beatles хамтлагийн “Sgt. Pepper’s Lonely Hearts Club Band” дууны үгийг уншин, үзэгчдийн өмнө бөхийн ёсолсон байна.
Өмнө нь Beatles хамтлагийн тухай олон кино хийгдэж байсан ч гишүүн тус бүрийн тухай өгүүлсэн кино бүтээгдэж байгаагүй юм. Найруулагч Сэм Мендес дөрвөн киног цаг хугацааны хувьд үзэх зөв дараалал гэж байгаа ч ямар дарааллаар үзэхийг нь хэлээгүй байна. Өдгөө амьд сэрүүн байгаа Beatles хамтлагийн хоёр гишүүний зөвшөөрөл, ивээлийг авсан уг дөрвөн кино 2028 оны 4-р сард дэлгэцнээ гарна гэдгийг найруулагч Сэм Мендес мэдэгджээ.