Nintendo компани видео тоглоомын ертөнцийн түүхэнд хамгийн өндөр борлуулалтай консолуудын нэг болох Switch-ийн дараагийн шинэ хувилбар болох Switch 2-ыг 6-р сарын 5-ны өдөр худалдаанд гаргахаар болсноо зарлажээ.

Switch 2 консолыг энэ жил худалдаанд гаргахаар болсныг анх өнгөрсөн 1-р сард зарласнаас хойш худалдаанд гарах товын тухай мэдээлэл видео тоглоом сонирхогчдын дунд хүлээлт үүсгээд байсан юм.

Тэгвэл Nintendo компанийн зүгээс цахим шууд дамжуулалт хийж дээрх мэдэгдлийг хийсэн бөгөөд мэдэгдэлд мөн Switch 2 консолд зориулан гаргах “Mario Kart World”, “Elden Ring”, “Street Fighter 6”, “Donkey Kong Bonanza”, “Kirby Air Riders” зэрэг шинэ видео тоглоомуудыг давхар зарласан байна. Түүнчлэн өмнөх Switch загварын тоглоомуудыг Switch 2 дээр тоглох боломжтойг мэдэгдсэн байна.

Nintendo компанийн ерөнхийлөгч Шүнтаро Фүрүкава мэдэгдэлдээ шинэ Switch 2 консолыг 8 жилийн өмнө гарч байсан анхны загвараас технологийн хувьд түвшин ахиж шинэчлэгдсэн гэдгийг онцолжээ.

График дүрс болон аудио дуугаралтын тал дээр шинэчлэлт хийснээс гадна тоглоом тоглож байх үедээ тоглогчид хоорондоо ярилцаж болох C (chat) буюу чатлах товчийг нэмж өгсөн байна. Мөн дэлгэцний хэмжээг томруулж, HDR дэмждэг 1080p нягтаршилтай болгосноос гадна консолын товчлууруудын хэмжээг нь томруулж, дотоод санах ойн хэмжээг ч нэмэгдүүлж 256GB болгосон байна.

Анхны Nintendo Switch консол 2017 онд худалдаанд гарснаасаа хойш дэлхийн хэмжээнд 150 сая гаруй хувь борлогдсноороо видео тоглоомын түүхэн дэх хамгийн өндөр борлуулалттай консолуудын жагсаалтын 3-т бичигдсэн юм.

Nintendo компанийн ерөнхийлөгч Шүнтаро Фүрүкава Switch 2 консолыг хангалттай олон тоогоор үйлдвэрлэх боломж бололцоогоо баталгаажуулсны дараа худалдаанд гаргах товыг зарласан бол АНУ-ын ерөнхийлөгч Д.Трампын тарифын бодлогын улмаас Switch 2 консолын борлуулалт анхны загвар шигээ өндөр үзүүлэлт үзүүлэх эсэх нь тодорхойгүй байна.