Хууль зүй, дотоод хэргийн сайд О.Алтангэрэл тушаал гаргаж, Дотоод хэргийн их сургууль (ДХИС)-ийн захирал, бригадын генерал Пүрэвдоржийн Батбаатарыг ажлаас нь чөлөөлжээ. Түүнийг чөлөөлнө гэдгээ өнгөрсөн долоо хоногийн сүүлчээр мэдэгдсэн аж.
ДХИС-ийн захирлаар Монгол Улсаас ОХУ-д суугаа ЭСЯ-ны зөвлөх бөгөөд ХЗДХЯ-ны ОХУ дахь байнгын төлөөлөгчөөр ажиллаж байсан, өмнө нь нийслэлийн Цагдаагийн газрын даргын албан тушаал хашиж байсан, хурандаа Очирхуягийн Зоригтыг томилжээ.
О.Зоригт ЗХУ-ын Дотоод явдлын яамны академийг хуульч-эрхзүйч мэргэжлээр, тус академийн 1 дүгээр факультетийг цагдаагийн байгууллагын удирдлагын менежер-мэргэжилтэн, 3 дугаар факультетийг дээд сургуулийн багш мэргэшлээр тус тус дүүргэж, ОХУ-ын Дотоод явдлын яамны Удирдлагын академид хууль зүйн ухааны докторын зэрэг хамгаалжээ.
Ажилласан байдал:
- 1991-1995 онд Цагдаагийн ерөнхий газрын Эрүүгийн хэлтэст төлөөлөгч
- 1995-1998 онд Цагдаагийн ерөнхий газрын Тамгын хэлтэст ахлах байцаагч
- 2004-2005 онд Цагдаагийн ерөнхий газрын Хяналт шалгалтын тусгай тасагт зохион байгуулагч
- 2005-2006 онд Цагдаагийн ерөнхий газрын Хэрэг бүртгэх хэлтсийн дарга
- 2006-2008 онд Цагдаагийн ерөнхий газрын Тамгын газрын дарга
- 2008 онд Нийслэлийн Цагдаагийн газрын дарга
- 2008-2009 онд Цагдаагийн академийн Цагдаагийн эрх зүйн тэнхимийн эрхлэгч
- 2011-2012 онд ЦЕГ-ын Мэдээлэл, шуурхай удирдлагын төвийн Захиргааны хэлтсийн дарга
- 2015-2017 онд Хууль сахиулахын их сургуулийн Эрдэм шинжилгээ, инновацын газарт эрдэмтэн нарийн бичгийн дарга
- 2017-2018 онд ЦЕГ-ын Мэдээлэл нэгтгэн боловсруулах газрын дарга
- 2018-2020 онд ЦЕГ-ын Мэдээлэл, дүн шинжилгээ, шуурхай удирдлагын албаны дарга
- 2020 онд Дотоод хэргийн их сургуулийн эрдэмтэн нарийн бичгийн дарга
- 2020-2022 онд Дотоод хэргийн их сургуулийн дэд захирал
- 2022-2023 онд Дотоод хэргийн их сургуулийн Сургалт, эрдэм шинжилгээний газрын захирал
- 2023 оноос ОХУ-д суугаа Монгол Улсын Элчин сайдын яамны зөвлөх