1000 жилийн түүхтэй үндэсний монгол бичгийг сурах, сургах, сурталчлах, түгээн дэлгэрүүлэх зорилготой Монгол туургатны “Миний монгол бичиг” 9-р уралдааныг зарласан байна. Уралдаан 4-р сарын 26-27-ны өдрүүдэд Занабазарын нэрэмжит Дүрслэх урлагийн музейд болно.
Уралдаанд оролцогчид заавал биечилж оролцох ёстойг зохион байгуулагч “Гандантэгчэнлин” хийд анхааруулжээ. Оролцогчид 2025 оны 4 дүгээр сарын 25-ны өдрийн 18:00 цаг хүртэл Монгол туургатны “Миний монгол бичиг” олон улсын уралдаан фэйсбүүк хуудсанд байрлах холбоосоор бүртгүүлнэ. Монгол бичгийн уралдаан бичгийн болоод бүтээлийн гэсэн хоёр төрлөөр явагдана. Бүтээлийн ангилалд оролцогчид цаас, торго, мод, төмөр зэрэг бусад материалаар Чингис хааны сургаал, Бурхан багшийн сургаал, эртний уран зохиол болон яруу найргийн сонгодог мөртөөс уран бичих, зурах, сийлэх, оёх, наамал бүтээлээр оролцоно. “Миний монгол бичиг” уралдаанд онлайнаар бүртгүүлэх боломжгүй тохиолдолд 2025 оны 04 дүгээр сарын 10-наас 04 дүгээр сарын 23-ны 18:00 цаг хүртэл “Гандантэгчэнлин” хийдийн Дашчойнпэл дацангийн “Монгол бичиг”-ийн өргөө сургалтын танхимд биечлэн бүртгүүлэх боломжтой.