УИХ-ын гишүүн О.Амгаланбаатар Амьтны тухай хуульд нэмэлт өөрчлөлт оруулах төсөл санаачилсан. Тэрээр уг хуулийн 25-р зүйлд “Амь нас, мал сүргээ хамгаалах зорилгоор чоно агнасан бол энэ хуулийн 25.1 дэх заалт хамаарахгүй” гэсэн заалт нэмэхийг хүсэж байна. УИХ-ын Байгаль орчин, хүнс, хөдөө аж ахуйн байнгын хорооны 24 гишүүний 86.7% нь уг заалтыг хуульд оруулахыг дэмжсэн юм.

УИХ-ын гишүүн Т.Аубакир мэтийн малгүй гишүүдэд чоно ямар гай удсан юм бүү мэд. “Нүүдэлчин ард түмэн “Чонотой газар малаа хариул. Чулуутай газар гэрээ барь” гэдэг. Чонотойгоо тэмцэж л амьдарч ирсэн шүү дээ. Ирвэстэйгээ, баавгайтайгаа ч юм уу зэрэгцэж амьдраад, өөрсдийгөө хамгаалдаг л байсан” гэж хэлчхээд дэмжсэн санал өгөөд сууж байгаа юм. Наанаа малгүй ч цаанаа малтай л бололтой дог. Эсвэл өөрөө чоно агнах гэсэн ч юм уу.

Малгүй гишүүдээс Б.Бат-Эрдэнэ гишүүн уг төслийг эсэргүүцэж байгаа юм. УИХ-ын чуулганаар уг хуулийн төслийн эхний хэлэлцүүлгийг өнгөрсөн 7 хоногт хийж, эцсийн хэлэлцүүлэгт бэлтгүүлэхээр УИХ-ын Байгаль орчин хүнс хөдөө аж ахуйн байнгын хороонд шилжүүлээд байна.

УИХ-ын Байгаль орчин, хүнс, хөдөө аж ахуйн байнгын хорооны малчин гишүүд

1. Ж.Батжаргал 68 адуу, 14 үхэр , 273 хонь, 56 ямаатай. Малаа нийтэд нь 139 сая 275 мянган төгрөгөөр үнэлжээ.
2. Р.Сэддорж 40 адуу, 55 тэмээ, 50 хонь, хурдан удмын 23 адуутай, 222.5 сая төгрөгийн малтай.
3. Ж.Чинбүрэн 40 адуу, 9 үхэр, 320 хонь, хурдан удмын 4 адуутай. 273 сая төгрөгийн малтай.
4. А.Ундраа 135 сая төгрөгийн малтай. 8 адуу, 38 үхэр, 12 хонь, 10 ямаа, хурдан удмын 2 адуутай.
5. У.Отгонбаяр хурдан удмын 2 адуутай. Түүнийгээ 50 сая төгрөгөөр үнэлжээ.
6. З.Мэндсайхан 1 тэрбум 344 сая төгрөгийн үнэ бүхий 260 адуу, 78 үхэртэй.
7. Л.Мөнхбаясгалан 103 сая төгрөгөөр үнэлсэн 48 үхэр, 110 хонь, 200 ямаатай.
8. Ц.Мөнхбат 49.5 сая төгрөгийн үнэ бүхий 100 хонь, 125 ямаа, 8 адуутай. Адууных нь 1 нь хурдан удмынх.
9. С.Лүндэг 6 сая төгрөгөөр үнэлсэн хурдан удмын 3 адуутай.
10. М.Мандхай 40 сая төгрөгийн үнэ бүхий хурдан удмын 4 адуутай.  
11. Ц.Идэрбат 80 сая төгрөгийн үнэтэй 30 үхэр, хурдан удмын 20 адуутай. 
12. Г.Ганбаатар 102.1 сая төгрөгийн үнэтэй 60 үхэр, хурдан удмын 29 адуутай. 
13. М.Ганхүлэг 185 сая төгрөгийн үнэ бүхий 20 үхэр, 152 хонь, 250 ямаа, хурдан удмын 10 адуутай.
14. С.Ганбаатар 128.6 сая төгрөгийн үнэтэй 60 үхэр, 100 хонь, хурдан удмын 16 адуутай.
15. Ж.Бат-Эрдэнэ 120 адуу, 80 үхэр, 320 хонь, хурдан удмын 64 адуутай. Нийтэд нь 587.5 мянган төгрөгөөр үнэлжээ.
16. Б.Бейсен 23 үхрээ 18.4 сая төгрөгөөр үнэлжээ.