Лхагва гарагт Санкт-Петербургийн олон улсын эдийн засгийн 28 дахь форум нээгдлээ.

ОХУ-ын хоёр дахь том хот болох Санкт-Петербург хотод жил бүр зохион байгуулагддаг тус чуулган энэ жил дөрвөн хоног үргэлжлэн зохион байгуулагдана.

2025 оны Санкт-Петербургийн олон улсын эдийн засгийн форум “Нийтлэг үнэт зүйлс: Олон туйлт дэлхий ертөнцийн хөгжлийн үндэс” гэсэн үндсэн сэдвийн хүрээнд явагдаж, оролцогчид олон улсын шинжтэй асуудлыг шийдвэрлэх үр дүнтэй арга замыг хайж хэлэлцэхээр төлөвлөжээ.

Тодруулбал, олон улсын эдийн засаг ноцтой сорилттой тулгарч буй энэ үед зохиогдож байгаа 2025 оны форум нь дижиталчлалыг түргэтгэх эрэлт хэрэгцээнээс эхлээд уур амьсгалын өөрчлөлтийг сааруулах зэрэг асуудлыг авч хэлэлцэх индэр болох төдийгүй дэлхийн эдийн засгийг шинэ нөхцөлд дасан зохицох чадвартай, бодитой тодорхой шийдлүүдийг боловсруулах платформ байх болно гэж зохион байгуулагчдын зүгээс онцоллоо.

Энэ жилийн форумд дэлхийн 140 гаруй улс орон, бүс нутгийн 21 мянга гаруй зочид төлөөлөгч, мөн олон улсын байгууллагуудын төлөөлөл ирж оролцож байгааг ОХУ-ын ерөнхийлөгчийн зөвлөх, Санкт-Петербургийн олон улсын эдийн засгийн форумыг зохион байгуулах хорооны гүйцэтгэх нарийн бичгийн дарга Антон Кобяков мэдээлсэн байна.

Түүнчлэн энэ удаагийн форумд олон төрлийн форматаар зохион байгуулагдах хажуугийн 150 гаруй арга хэмжээ багтаж байгаа бөгөөд ОХУ, Хятад, АНУ, Турк, Бразил, Вьетнам, Энэтхэг, Иран, АНЭУ, Африк тив болон Латин Америкийн орнууд, ЕХ, АСЕАН-ы гишүүн орнуудын бизнес эрхлэгчдийн хооронд нийт 6.4 их наяд рублиэр хэмжигдэх 1073 гэрээ, хэлэлцээр байгуулагдах талаар мэдээлжээ.

ОХУ-ын ерөнхийлөгч В.Путин 20-ны өдөр зохиогдох форумын нэгдсэн хуралдаанд оролцож үг хэлэхээр болсон байна.