МАН уг нь дараагийн даргаа л сонгох гэж байгаа юм. Өмнө нь туг далбаа, сүрлэг марш, бэлгэ дэмбэрэл дунд, ихэвчлэн УИХ-ын сонгуулийн ялалтыг замнасан протоколтойгоор дараагийн лидерээ зарладаг байсан нам л даа. Л.Оюун-Эрдэнэ тогтсон хэм хэмжээг эвдэж, жагсаалын аргаар, гудамжнаас тэнд хүрсэн. Түүний хэрхэн Ерөнхий сайд, МАН-ын дарга болсон арга зам хуучинсаг намаа, аядуу зөөлөн улстөрчдөө харж дадсан хүмүүсийг өнөө хэр эвгүйцүүлсэн хэвээр байгаа. Энэ удаад тайзан дээр Г.Занданшатар, Д.Амарбаясгалан хоёроос өөр хүн МАН-ын дарга болохоор гарч ирсэнгүй. Үүнээс өмнө ч тэд МАН-ын боловсон хүчний нөөцөд дээгүүр эрэмбэлэгдсээр ирсэн, тэр хэрээрээ олны нүд чихэнд үргэлж ил байсан, үүндээ өөрсдөө ч дасчихсан ийм л хоёр хүн байв. Хэрэв УИХ-ын дарга Д.Амарбаясгалан өрсөлдөхгүй байсан бол энэ марафон бүр ч гунигийн жүжиг болно. 70-аад оны Г.Занданшатарын секс дуулианаар олон нийтийн анхаарлыг МАН-ын дараагийн даргад татахгүй. Ерөнхий сайдын эрхэлж байгаа гүйцэтгэх засаглалын ажлаар нь ч бас өдөр бүр шуугиулах хаашаа юм. Нэр дэвшигчдийн төлөө ба эсрэг мэдээллийн дайн 80-ад оны хэн нэгнийг ямар нэгэн аргаар шүршиж л өрсөлдөөнийг “хөглөхөөс” аргагүй байна. Д.Амарбаясгалан улс төрийн намын ирээдүйн удирдагч болохын хувьд 2016 оноос хойших бүх сонгуульд төв штаб ахалж орсон. Фронтын манлайллаараа тэр өнөөдрийн ялалт авчирсан уу гэвэл тийм. Эрх барьж буй хүчнийг удирдана гэдэг улс төрийн эрх мэдлийн төлөөх сонирхлын бүлгүүдийн тэмцэл учраас, жижиг улстөрчдийн хэрэг биш. Мэдээллийн тэнцвэрийг хол хаясан шийдлүүд ширүүн эхэлж байгаа нь ирэх өдрүүдэд МАН-д дүрэм журам үлдэхгүй болтол хурцдах нөхцөл үүсгэх магадлалтай боллоо. МАН-ын даргад дэвшигч хоёр хүний хоорондын гэхээсээ өрсөлдөөнийг байлж буй бүлэглэлүүд нь нийгмийг чухам ямар мэдээллээр чилээх тэмцэл ид өрнүүлж байгааг олон нийт харах хэрэгтэй. Хэн өөрийгөө дараагийн лидерт санал болгохоор зориглох магадлалтайг үргэлж анаж байдаг ажиглагчид ажлаа хийж байна гэсэн үг. Том анхаарал, хүсээгүй халамж, авлигын хэргүүдэд нэрийг нь хутгасаар марафоныг өндөрлүүлэх нь тодорхой боллоо. Д.Амарбаясгалан анх 2016 онд МАН-ын ерөнхий нарийн бичгийн дарга болж “У.Хүрэлсүхийн хүн” гэгдсэн арван жилийн замналтай. Нэгэн цагт У.Хүрэлсүхийн эвэр гүйцсэн шиг жам ёсны гэж хэлж болох үйл явц л өрнөж байна. Эрх мэдлийн төлөөх тэмцэл яг одоо болж байгааг та бид ажиглаж байна. Арын албаныхан харин буруу зөвгүй өрдөж байж гэрээ шатаавуузай.