Хятадын төрийн тэргүүн Ши Жиньпин өчигдөр АНУ-ын Ерөнхийлөгч Доналд Трамптай утсаар ярьж, “Хятад улс Тайванийг эргүүлж авах хэвээрээ шүү” гэж хэлжээ. Ши Жиньпин мөн “Хятад улс Тайванийг эргүүлж авах нь дайнаас хойших олон улсын тушаалын нэг хэсэг” гэж хэлсэн хэмээн Хятадын Гадаад хэргийн сайд мэдээллээ.

Хятад улс Тайванийг өөрсдийн газар нутгийн нэг хэсэг гэж тооцдог. Хэрэв шаардлагатай бол хүч хэрэглээд ч хамаагүй Тайванийг булааж авна гэдгээ мэдэгдсэн юм.

Японы Ерөнхий сайд Санаэ Такаичи өнгөрсөн сард Доналд Трамптай уулзаж, АНУ-Японы харилцааг бэхжүүлснийхээ дараа энэ сарын эхээр “Хэрэв Хятад улс Тайвань руу дайрвал Япон цэргийн хүчээр хариу барина” гэж цочир мэдэгдэл хийсэн нь гал дээр тос нэмсэн үйлдэл болж, Хятад-Японы харилцаа огцом муудсан. Хятад улс улмаар Японоос авдаг далайн гаралтай бүтээгдэхүүнийг хориглож, хятад иргэдээ Япон руу аялахаас татгалзахыг анхааруулсан юм.

Японы Ерөнхий сайд Санаэ Такаичи уг мэдэгдлийнхээ дараа хүчтэй шүүмжлэлд өртөж эхэлсэн. Өнөө өглөө тэрээр АНУ-ын ерөнхийлөгч Доналд Трамптай утсаар ярьж, энэ асуудлаар зөвлөгөө авсан байна.

Доналд Трамп өнгөрсөн шөнө Ши Жиньпинтэй утсаар ярьсан талаараа “Truth Social” платформ дээр нийтлэхдээ “Тайванийн асуудлын талаар хөндөөгүй. АНУ-Хятадын харилцаа сайн хэвээр байгаа” гэж мэдэгдсэн байна.

Эх сурвалж: Guardian news