Сингапурын засгийн газар электрон тамхи хэрэглэхийг албан ёсоор 2018 оноос хориглосон. Тэгвэл тус улс электрон тамхийг хар тамхи мансууруулах бодистой дүйцэхүйц гэж ангилах болсноо зарлалаа. 

Тус улсын IPB их сургуулийн анагаах ухааны факультетийн багш, доктор Юсуф Ряди электрон тамхи нь эрүүл мэндэд олон эрсдэл учруулдаг бөгөөд зарим талаараа уламжлалт тамхинаас ч илүү аюултай гэдгийг нотолжээ.

“Тамхины аюулгүй хувилбар гэж үздэг ч вейп нь никотин, органик уусгагч, амт оруулагч зэрэг янз бүрийн хортой бодис агуулдаг бөгөөд энэ нь биед үрэвслийн урвал үүсгэж болзошгүй” гэж доктор Юсуф тайлбарлав.

Судалгаагаар вейп хэрэглэх нь амьсгалын замын эмгэг, зүрх судасны өвчний эрсдэлийг нэмэгдүүлж, донтуулдаг гол бодис болох никотин нь ялангуяа тархины хөгжлийн үе шатандаа явж буй өсвөр насныхан болон залуу насанд хүрэгчдийн дунд донтолт үүсгэх магадлал өндөр байдаг.

Вейп шингэний задрал нь ДНХ-ийг гэмтээж, хорт хавдрын эсийн өсөлтийг өдөөх боломжтой формальдегид, ацетальдегид, акролейн зэрэг хорт хавдар үүсгэгч нэгдлүүдийг үүсгэдэг болохыг тогтоожээ. Вейп аэрозол дахь нарийн ширхэгтэй тоосонцор нь уушгины цулцан руу орж, ноцтой үрэвсэл үүсгэдэг байна.

Сингапурын хууль тогтоох байгууллагын шинээр боловсруулсан Цахим тамхины хуулиар хэрэглэгчдэд 10 мянган доллар, худалдагчдад 200 мянган доллар, хууль бус наймаа эрхлэгчдэд 300 мянган долларын торгууль ногдуулахаар болжээ. Засгийн газар цахим тамхины эсрэг шинэ хуулиудыг санал болгосон бөгөөд хэрэглэгчдэд ногдуулах торгуулийг одоогийн хэмжээнээс тав дахин, худалдагчдад 20 дахин, хууль бус наймаа эрхлэгчдэд 30 дахин нэмэгдүүлэхээр төлөвлөж байна.