Урин дулааны цагт бага насны хүүхдүүдэд гар, хөл, амны өвчин тусах эрсдэл нэмэгддэг. Халуурах, ам болон гар, хөл дээр цэврүүт тууралт гарах зэрэг шинжээр илэрдэг энэ халдварт өвчин хүүхдүүдийн дунд амархан тархдаг.

Иймээс эцэг эх, асран хамгаалагчид дараах зөвлөмжийг хэрэгжүүлэхийг эрүүл мэндийн байгууллагаас зөвлөж байна.

• Хүүхдийн гарыг тогтмол савандаж угаах (ялангуяа хоолны өмнө, бие зассаны дараа)
• Хоол, хүнсний аюулгүй байдлыг хангаж, цэвэр ус хэрэглэх
• Хүүхдийн тоглоом, хэрэглэлийг тогтмол цэвэрлэж ариутгах
• Өвчтэй хүүхдийг бусдаас тусгаарлаж, цэцэрлэг, сургуульд явуулахгүй байх
• Халуурах, тууралт гарах, хоол идэхгүй байх зэрэг шинж илэрвэл яаралтай эмчид хандах
• Хүүхдийн дархлааг дэмжих тэжээллэг хоол, амин дэм хэрэглэх

Гар, хөл, амны өвчин ихэвчлэн хөнгөн явцтай боловч бага насны хүүхэд тусвал хүндрэх эрсдэлтэй тул эрт илрүүлж, зөв арга хэмжээ авах нь чухал аж.